Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

DILI, 16 janeiru 2020 (TATOLI)–Prezidente Konsellu Nasionál Juventude Timor-Leste (CNJTL-sigla Portugés), Maria Dadi Soares Magno, hateten durante nia madatu CNJTL serbisu hamutuk ho Sekretaria Estadu Juventude no Desportu (SEJD) konsege prodús Polítika Juventude Nasionál.

“Liga ba asuntu dezempregu CNJTL liuliu iha ha’u-nia mandatu serbisu hamutuk ho SEJD, ita konsege estabelese ona Polítika Juventude Nasionál,” Maria ba jornalista Tatoli iha Sentru Konvensaun Dili (CCD-sigla Portugés), ohin.

Nia esplika, polítika juventude nasionál ne’e prioridade ba asuntu lima mak hanesan juventude liga ba edukasaun, empregu no empregalidade, partisipasaun sívika juventude no liga ba violénsia ho krime.

Dadi hatutan, asuntu kona-ba empregu no empregalidade ida-ne’e kontestu ida-ne’ebé realidade duni tanba defaktu problema mak dezempregu.

“Ha’u ko’alia hanesan ne’e tanba ita hatene katak kada tinan ita-nia estudante sira ne’ebé akaba sira-nia estudu formál iha sekundária kuaze kada tinan rihun 15 to’o rihun 20 ne’e seidauk inklui mós ba univesitáriu sira,” nia subliña.

Prezidente CNJTL ne’e haktuir katak kada tinan eskola prodús estudante barak hanesan ne’e parte ida di’ak no sente kontente tanba haree iha estatístika, maibé liga ba risku ne’ebé maka iha kampu serbisu la hanesan nesesidade joven sira ne’ebé maka atu tau espasu hanesan ida-ne’ebé idade produtivu atu hetan empregu.

“Bainhira ita ko’alia kona-ba dezempregu, kategoria oioin hanesan dezempregu nakloke, dezempregu tuir tempu no metade,” nia haktuir.

Nia esplika, dezempregu metade mak hanesan bainhira tau ema iha pozisaun ida tenke bazeia ba nia profisaun, abilidade, nia antesedénsia estudu atu hetan iha espasu iha empregu ne’e rasik.

Nune’e mós iha dezempregu nakloke katak empregu ida-ne’ebé maka laiha duni serbisu, automatikamente ema sira-ne’e sai empregu.

Nia salienta, dezempregu tuir tempu (musiman) katak haree agora daudaun situasaun atuál iha Timor hanesan inan-aman sira iha foho hein udan tun mak ke’e rai kuda batar maibé hafoin udan tau liu entaun klima manas labele halo buat ida.

Entretantu, nia haklaken, kona-ba arte marsiál no arte rituál ne’ebé durante eziste iha Timor ne’e hamutuk 9 no Estadu iha rezolusaun ida katak bandu atividade arte marsiál no rituál.

“CNJTL halo analiza ba situasaun ida-ne’ebé mak iha ita haree katak tendénsia ida konflitu ne’e aas liu antes rezolusaun ne’e taka. Nia persentajen ne’ebé kauza mai husi violénsia arte marsiál ne’ebé bandu ne’e iha pursentu 14 maibé hafoin rezolusaun ne’e sai no bandu ita-nia arte marsiál sira-ne’e tendénsia ba konflitu ne’e sa’e ba pursentu 48 ,” Prezidente CNJTL relata.

Maria salienta, CNJTL analiza ba situasaun sira-ne’e entaun loke semináriu nasionál ba kamada arte marsiál no arte rituál sira ho tema ‘Reativa ka la reativa arte marsiál’.

Nia subliña, objetivu husi semináriu ne’e atu orienta arte marsiál no arte rituál ba kompetisaun atu eleva prestasaun.

Jornalista: Hortençio Sanches

Editór: Xisto Freitas

HAKEREK NO HATÁN

Please enter your comment!
Please enter your name here