Membru PN hosi Bankada FRETILIN, Antoninho Bianco.

DILI, 15 janeiru 2020 (TATOLI)—Deputadu Bankada FRETILIN, Antoninho Bianco, husu Governu labele dependénsia ba fundu minarai maibé esforsu buka reseita seluk substitui hodi sustenta Estadu ida-ne’e.

Nia dehan, ko’alia kona-ba Orsamentu Jerál Estadu (OJE), refere liu reseita ne’ebé atu sustenta Estadu ne’e ba oin.

“Reseita ne’ebé atu sustenta Estadu ida-ne’e ba oin mak importante liu. Hosi dadus ne’ebé mak ami iha, fonte reseita ne’ebé ita iha ne’e ita depende ba mina tanba ita exporta mina, maibé reseita hosi Bayu Undan ne’e sei mohu iha 2022 no to’o 2024 zero reseita hosi minarai. Ita sei depende de’it mak jurus mai hosi líkuidu no diversifikasaun investimentu uitoan no mós jurus iha banku”, Bianco dehan iha plenária Parlamentu Nasionál lihusi debate jeneralidade OJE 2020, ohin.

Tanba ne’e, Deputadu Bankada FRETILIN husu ba Primeiru-Ministru, Taur Matan Ruak, Timor-Leste sei substitui ho saida bainhira Bayu Undan termina iha 2022 no iha ka laiha reseita seluk bainhira exportasaun mina laiha ona.

“Iha tasi laran bele ka lae. Iha rai maran bele ka lae. Se laiha entaun parte reseita hosi mineiru iha karik atu asegura sustentabilidade despeza Estadu ida-ne’e nian. Se iha karik, hatudu mai hosi parte ne’ebé. Laiha karik tanbasá”, nia kestiona.

Deputadu ne’e mós husu karik hosi parte esportasaun bele substitui bainhira reseita Bayu Undan laiha ona.

“Tuir dadus ne’ebé iha, tinan 2018 ita lakon osan ema na’ok hosi tasi nian (peska ilegál) barak tebes. Tinan 2019 mós iha dadus. Governu iha esforsu kona-ba ida-ne’e ka lae, tanba ita dependénsia liubá esportasaun hahán hosi rai-li’ur. Nune’e mós, investimentu iha rai-laran tun. Ema li’ur mós la tama, kauza hosi ne’ebé”, Bianco hatutan.

Nia afirma, situasaun hirak-ne’e bainhira laiha mudansa, kada tinan dezempregu sei aumenta ba beibeik.

Deputadu Bankada Opozisaun ne’e husu Xefe Governu fó orientasaun ba membru Governu sira hodi haree situasaun hirak-ne’e ho sériu no husu Governu dezenvolve setór produtivu sira hodi bele kontribui reseita ba Estadu.

Entretantu, preokupasaun hirak-ne’e, Primeiru-Ministru, Taur Matan Ruak, sei resposta iha sesaun parte loraik.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here