Sesaun plenária Parlamentu Nasionál. Imajen/TATOLI

DILI, 15 janeiru 2020 (TATOLI)—VIII Governu Konstitusionál lideradu Primeiru-Ministru, Taur Matan Ruak, kompromete Orsamentu Jerál Estadu (OJE) 2020 sei kontribui kreximentu ekonómiku pursentu 6.0.

“Iha dezafiu balun ne’ebé kontinua lori hosi 2018 ba 2019 no sei afeta ba projesaun kreximentu ekonómiku. Orsamentu Jerál Estadu 2020 prevé sei kontribui ba kreximentu ekonómiku ne’ebe forte ho taxa kreximentu %6,0”, dokumentu hosi Livru Panorama Orsamentál 2020 ne’ebé tuir ajenda sei aprezenta iha Parlamentu Nasionál, ohin, esplika.

Tuir livru 1 (Panorma Orsamentál), kreximentu ekonómiku atu sai nasaun ho rendimentu médiu‐altu iha 2030, presiza kreximentu ekonómiku la’ós minarai ne’ebe forte no iha kualidade. Investimentu públiku liuhosi politíka fiskál antesipada (frontloading fiscal policy) iha períodu 2008 to’o 2018 rezulta ona ba média kreximentu ekonómiku 47% kada tinan.

Dezempeñu ne’e ho objetivu atu estabelese kondisaun nesesária ba dezenvolvimentu ekonómiku sustentável ba tempu, ne’ebe sei lidera hosi setór privadu. Kreximentu PIB (Produtu Internu Brutu) reál ba 2018 maka -%0,8, sa’e kompara ho %3,8 iha tinan 2017.

Maski Timor-Leste hetan resesaun ekonómika, maibé konsumu uma kain kontinua sa’e iha períodu resesaun, ne’ebé indika katak iha melloramentu ba padraun moris povu nian.

Iha tinan kotuk, bainhira aprezenta proposta OJE 2020 ba plenária Parlamentu Nasionál, Primeiru-Ministru (PM), Taur Matan Ruak, hateten Oitavu Governu kontinua esforsu liuhusi planu asaun no orsamentál hodi hasa’e kreximentu ekonómiku Timor-Leste (TL) ba %7,2.

“Durante tinan ida-ne’e, ekonomia hatudu ona sinál rekuperasaun no aselerasaun, ne’ebé bele haree momoos. Kreximentu ne’ebé forte husi ita-nia Produtu Internu Brutu la’ós-Petrolíferu, ne’ebé daudaun ne’e kalkula ba 5,1%, fó mai ita konfiansa no espetativa ne’ebé boot atubele alkansa iha tinan 2020, kreximentu ekonómiku ida hamutuk %7,2, atu kumpre hotu ita-nia kompromisu ne’ebé Governu asume ona ba povu no ba Parlamentu Nasionál liuhusi ninia programa”, Xefe Governu afirma iha ámbitu debate proposta lei Orsamentu Jerál Estadu (OJE) 2020 iha Parlamentu Nasionál, dezembru 2019.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here