Taxista Lamberto Neves. Imajen/Natalino Costa.

DILI, 15 janeiru 2020 (TATOLI) – Taxista, Lamberto Neves, husu ba Diresaun Nasionál Transporte Terrestre (DNTT) atu hadi’a semáforu (lampu merah) balun ne’ebé la funsiona iha Dili, liuliu iha área loja Lider nia oin.

“Nu’udar taxista ida, ha’u preokupa ba lampu merah iha Lider nia oin, tanba la funsiona dezde fulan kotuk liubá. Governu tenke tau atensaun ba kestaun sira ne’e, labele husik de’it, tanba bele fó risku ba ema nia vida liuliu ba ami-sira lori karreta no mós kolega sira la’o ain”, nia dehan  ba TATOLI iha Timor Plaza, ohin.

Semáforu iha loja Lider nia oin ne’ebé la funsiona. Imajen/Natalino Costa.

Taxista husu ba Diresaun Nasionál Transporte Terrestre (DNTT) atu tau atensaun ba semáforu, tanba sirkulasaun karreta ho motór barak, bele implika ba asidente.

“DNTT presiza tau-matan, tanba semáforu hanesan sinál ida ne’ebé ema atu hodi kumpre bainhira lori karreta ho motór, nune’e bele sai hanesan fatór ida ba vida ema nian, tanba ne’e presiza tau atensaun ba kestaun sira hanesan ne’e, se lae bele provoka asidente tráfegu iha loja Lider nia oin tanba iha ne’e kruzamentu”, katak.

Iha fatin hanesan, motorista mikrolete 03, Rogério Martins, preokupadu tebes ho semáforu ne’ebé aat, tanba bele fó risku ba nia ne’ebé loroloron kondús karreta.

Lampu merah iha parte ne’e aat kleur ona no hosi parte DNTT seidauk mai haree hodi funsiona hikas fali. Ami agora halai karreta iha ne’e kuidadu tebes, tanba iha ne’e dalan kruzamentu ho lampu merah ida la funsiona, ami ta’uk tanba bele fó impaktu ba movimentu sirkulasaun ami ho pasajeiru”, hateten.

Hatán ba kestaun ne’e, Xefe Departamentu Sinál Tránzitu hosi DNTT, João Eugénio, konsidera semáforu iha loja Lider nia oin la funsiona dezde fulan kotuk tanba kauza hosi udan, anin, rai-lakan ne’ebé akontese iha dezembru hodi hafraku semáforu nia funsionamentu.

“Maibé ami-nia parte esforsu hela hodi kontaktu ho Kompañia Sagus Unipessoal, Lda, ne’ebé toma konta service lampuh merah sira iha kapitál. Tuir informasaun sira haruka ona iha Surabaya atu mai, ha’u hanoin tempu badak nia-laran, sasán sei mai no kompañia sei hadi’a filafali”, afirma.

Maske nune’e, parte DNTT labele promote atu hadi’a iha aban ka semana ida ne’e nia-laran, tanba ekipamentu hirak ne’e sei enkomenda mai, maibé bainhira to’o ona maka DNTT sei haruka empreza hadi’a hodi funsiona normál.

Nia afirma katak semáforu sira iha Dili funsiona normál, úniku iha loja Lider nia oin maka provizóriu la funsiona tanba kauza hosi udan.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here