Diretór Administrasaun Finansa no Lojístika, HNGV, Duarte Marçal Araújo. Imajen: Felicidade Ximenes

DILI,15ja neiru 2020 (TATOLI)-Ospitál Nasionál Guido Valadares (HNGV) sei estabelese fatin kardiolojia rua, iha tinan-2020 ne’e.

“Fatin kardiolojia rua refere, ida naran intervensaun kardiolojia no fatin ida seluk mak ICCU ne’ebe halai liu ba fuan nian. Fatin refere, konstrusaun ramata ona. Tinan ida ne’e (2020), ita sei uza hodi hala’o tratamentu ba ema moras fuan nian,” Diretór Administrasaun no Lojístika HNGV, Duarte Marcal de Araújo informa ba jornalista sira, ohin.

Intervensaun kardia ne’e, nia hatutan, pasiente balun problema ho nia kurasaun hakarak atu tau kadeli entaun doutór espesialista sira husi Malázia prontu atu atende.

Nia informa, númeru kona-ba moras fuan ne’ebé mak agora daudaun nafatin ba rai li’ur maibé iha 2020 ne’e sei redús tanba Timor-Leste iha ona fatin ba ida ne’e.

“Ita-nia espesialista ba fuan mós iha ona. Entaun, iha tinan ida ne’e mak realiza ita-nia médiku espesialista mós akompaña ita. Ne’ebé, ita iha fatin rua. Ida tau kadeli no mós ida ba moras fuan nian maibé fatin ne’e sei liga hamutuk,” nia dehan.

Nia haktuir, Timor-Leste agora médiku espesialista ne’e na’in rua. Médiku espesialista ida, tuir nia, agora daudaun sei ba hala’o estudu kona-ba oinsá atu tau kadeli ne’e no médiku espesialista ida seluk mak sei iha ne’e hamutuk ho doutór Cubano sira.

Maibé, nia haklaken, kona-ba ekipamentu ne’ebé iha akordu husi Ministériu Saúde mak harii ida ne’e, maibé konstrusaun ne’e ninia ekipamentu sira sei fornese hotu husi Malázia tanba orientasaun ne’e husi Vise-Ministru Dezenvolvimentu Estratéjiku Saúde.

Daudaun ne’e, nia dehan, Timor-Leste sei haruka timoroan na’in haat (4) hodi ba tuir treinamentu ba kardiolojia nian iha rai li’ur bainhira orsamentu jerál estadu aprova no iha ona.

“Maibé ida ne’e planu ida. Oinsá progresu ne’e la’o ba oin bainhira Orsamentu Jerál Estadu iha mak ami bele haruka sira ba tuir treinamentu iha Malázia kona-ba sinkron nian,’’ nia haklaken.

Entretantu kona-ba mákina hitopatolojia ne’ebé durante ne’e funsiona iha ona HNGV, nia dehan, instalasaun hotu ona maibé problema ida mak reajante iha buat balun ne’ebé tékniku uitoan.

Entaun, nia hateten, ema peritu balun mai orienta fila fali doutór sira para halo orientasaun doutór timoroan sira hamutuk ho tékniku ida sei hala’o treinamentu iha Singapura fulan ida-nia laran.

“Iha 2020 mak ita dúvida oituan kona-ba lala’ok operasaun nian, ita bolu tékniku ka espesialista ruma husi Surabaia, Indonézia, para mai akompaña hodi halo introdusaun de’it kona-ba mákina ne’e tanba mákina sei foun seidauk uza. Foin daudauk atu uza maibé reajante ka la iha mákina ne’e,” nia hateten.

Tuir planu, nia esplika, iha tinan ida ne’e sei estabelese no bainhira doutór ne’e fila husi singapura. Nia dehan, doutór ba asuntu ida ne’e iha rua maibé tanba ida moras kankru ne’e, agora daudaun hala’o hela tratamentu iha Jakarta, Indonézia. Iha tempu, tuir nia, Timor-Leste sei utiliza mákina hitopatolojia.

Jornalista : Felicidade Ximenes

Editór      : Rafy Belo  

HAKEREK NO HATÁN

Please enter your comment!
Please enter your name here