Kursu indusaun iha Institutu Estudu Diplomatiku (IED) iha MNEK. Imajen: Nelia Fernandes

DILI, 15 janeiru 2020 (TATOLI) – Koordenadór Institutu Estudu Diplómatiku MNEK (Ministériu Negósiu Estranjeiru no Kooperasaun), Aurélio Guterres hateten, ohin, Prezidente Republika (PR) dezigna embaixadór na’in 11 tuir kursu indusaun iha Institutu Estudu Diplomatiku (IED) iha MNEK antes ba hala’o misaun iha rai li’ur.

“Resentamente ita-nia Prezidente Repúblika dezigna ona embaixadór na’in 12, atu destaka ba iha país sira ne’ebé iha rejiaun no mós iha Eropa liuliu nasaun sira ne’ebé iha koopresaun no iha ligasaun ho Timor-Leste. Embaixadór sira ne’e antes atu aranka, sira tuir kursu ka formasaun ida ba embaixadór,” Aurélio Guterres dehan ba jornalista sira iha praia dos Coqueiros, Dili, ohin.

Diplomata ne’e hatutan, formasaun ne’e iha komponente tolu mak kona-ba Politika Kuadru Legál sira Timor-Leste nian, kestaun Protokolár sira ita-ni’an no komponentes ikus liu kona-ba kestaun Administraaun Finansa no mós Planu Dezenvolvimentu Nasionál ita-nia rai nian.

“Sira tuir formasaun durante loron lima. Sira hala’o iha dadeer no lorokra’ik. Iha formasaun ne’e, loron ida, sira sei tuir oras ne’en nia laran,” nia dehan.

Formadór sira, nia informa,  mai husi Timor-Leste nia rekursu rasik iha área oin-oin hanesan área kooperasaun bilaterál sira, asuntu bilaterál sira, asuntu multilaterál sira, asuntu rezionál sira, asuntu kona-ba planu finansas, liuliu politika eksterna iha Timor-Leste.

“Institutu Estudu Diplomatiku (IED) nia knaar no funsaun mak prepara formasaun ba ita-nia diplomata sira, inklui embaixadór sira, para bainhira sira ba reprezenta interrese Timor-Leste iha rai liur karik, ita hakarak reprezenta ho didi’ak ou hala’o diplomasia ida ho kualidade,” nia konsidera.

Iha parte seluk, Embaixadór dezignadu, Ilídio Ximenes da Costa agradese ba IED ne’ebé fó formasaun no agradese ba konfiansa ne’ebé Primeiru-Ministru  no agradese mós ba iha AMP, liuliu ba partidu ne’ebe fó konfiansa ba nia atu ba hanesan embaixadór iha Japaun.

“Formasaun ne’ebé hala’o dadauk ne’e importante tanba bele aumenta ha’u-nia kapasidade, aumenta ha’u-nia koñesimentu ne’ebé iha área diplomasia. Atu ba ka la ba mós hetan ona matenek ida tan,” nia dehan.

Iha Japaun, nia dehan, nia ba hatutan de’it no mós buka posibilidde balun ne’ebé bele koopera di’ak liután ho governu Japonês, para kapasita ita-nia joventude sira iha área formasaun. Ida seluk, nia hateten,  atu sei halo kooperasaun di’ak ho Governu Japaun iha área agrikultura avansada.

Entretantu, embaixadór dezignada na’in 11 ne’ebé tuir formasaun Indusaun iha Institutu Estudu Diplomatiku durante loron lima ne’e mak hanesan Embaixadór Abrão dos Santos sai embaixadór iha Repúblika Popular Xina, Embaixadór Gil da Costa sai embaixadór iha Reinu Unidus, embaixadór Ermenegildo “Kupa” Lopes sai embaixadór iha Cambodia, no embaixadóra Isabel Amaral Guterres sai embaixadóra ba Portugal.

Embaixador seluk, nia informa, embaixadóra Inês Maria de Almeida sai embaixadóra ba Austrália, embaixadór Ilídio Ximenes da Costa sai embaixadór ba Japaun, no embaixadóra Juvita Rodriques Barreto de Ataide Gonçalves sai embaixadóra ba Vatikanu.

Embaixadóra Maria Renata Caldas de Jesus sai embaixadóra iha Laos PDR, embaixadóra Maria Natália Guterres Viegas Carrascalão sai embaixadóra iha Singapura, embaixadóra Armandina Maria Gusmão dos Santos sai embaixadóra ba Reinu Tailândia, no embiaxadór Paulo Assis Belo sai embaixadór iha Moçambique.

Nia informa, pais ida ne’ebé embaixadór sira atu ba iha tinan ida ne’e mak Austrália, Laos, Cambodia, Vietname, Portugal, Mozambique, Japaun, no Xina.

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here