Logotipu MEJD

DILI, 13 janeiru 2020 (TATOLI) – Enkontru liña ministeriál sira ba komisaun organizadora ba preparasaun Jogu Desportivu no Konferénsia da Ministru Juventude no Desportu CPLP, ohin, SEJD aprezenta orsamentu preliminariu ho total orsamentu $2,250,00 millaun hodi utiliza ba eventu refere.

Iha enkontru refere, Reprezentante Ministériu Finansas, Agustinho Castro, hato’o sujestaun ba montante orsamentu ne’ebé aloka ba eventu rua ne’e boot tebes, tanba ne’e tenke kria mós ekipa tékniku aprovizionamentu husi MEJD rasik.

“Ohin, ita hotu haree ona aprezentasaun orsamentu $2,250,00 millaun ne’e boot tebes. Se iha relasaun ho aprovizionamentu, di’ak liu ita tenke iha tékníku. Tanba, iha eventu ne’e ita bele halo jogu maibé ikus mai sei iha auditoriu husi tribunál das kontas,” dehan Reprezentante Ministériu Finansas, Agustinho Castro, iha salaun enkontru MEJD, Vilaverde, Dili, ohin.

Ministériu Edukasaun, Juventude no Desportu (MEJD), nia hatutan, tenke iha tékniku aprovizionamentu rasik, atu nune’e Ministériu Finansas bele fasilita ho lalais.

Hatán ba kestaun ne’e, Ministra Edukasaun, Juventude no Desportu (MEJD), Dulce de Jesus Soares, afirma maske nia mak asumi kna’ar nu’udar prezidente ba eventu rua ne’e maibé tékníkamente serbisu barak liu sei hala’o iha Sekretária Estadu Juventude no Desportu (SEJD).

“Entaun, kona-ba tekníku aprovizionamentu Ministériu Edukasaun Juventude no Desportu (MEJD) no Ministériu Finansas (MF) mak sei asumi hamutuk iha ekipa aprovizionamentu ne’e,” nia esplika.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here