DILI, 11 janeiru 2020 (TATOLI)-Instituto Professional de Canossa, (IPDC), ohin, entrega sertifikadu ba estudante dahuluk na’in 16 ho nível báziku ne’ebé durante ne’e tuir kursu ho lian Mandarin.
“IPDC iha laboratóriu ba língua, durante ne’e fó hela kursu portugés, kursu inglés no ami hanoin oferese tan língua estranjeiru seluk, língua Xina, iha Mandarin,” dehan Reitora IPDC, Ervinia Martins Brito, ba Ajénsia TATOLI iha ámbitu serimónia sertifikasaun ba grupo dahuluk estudante kursu báziku lian Mandarin iha laboratóriu lian Santa Bakita, iha Canossa Has-Laran.
Razaun loke kursu mandarin, tuir reitora IPDC, tanba iha estudante barak hakarak konkorre ba bolsa estudu xina nian. Profesór sira mesak timoroan.
“Ami hetan profesór, estudante na’in tolu ne’ebé akaba sira-nia eskola iha Xina, nune’e sira prontu atu fó kursu mandarin no tanba ne’e kursu ne’e lao to’o agora no ohin ita bele hetan graduasaun ba estudante 16,” nia relata.
Ho entrega kursu lian mandarin ne’e, Reitora IPDC Ervinia Martins Brito espera kursu ne’e sei kontinua nafatin ba oin. “Kursu ne’e sei loke ba estudante sira, alende fó mós oportunidade ba funsionáriu sira liliu ba ami atu serbisu hamutuk ho SEFOPE, se ami hanoin ba futuru sira bele lori sira-nia funsionáriu sira, bele hatene kursu iha ne’e”.
“Kursu ne’e hanesan baziku. Sei ko’alia fali ho profesór na’n tolu ne’e. Se sira prontu atu kontinua ba intermediu no sira kontinua ho báziku ho intermediu. Agora avansadu ne’e ita husu hela husi embaixada Xina, bele prontu ba fasilita profesór sira ne’ebé mai kursu avansadu,” nia hateten.
Entertantu, partisipante iha serimónia entrega sertifikadu ba estudante dahuluk na’in 16, ne’ebé estuda lian Mandarin ne’e mak Embaixadór Xina iha Timor-Leste, Xiao Jianguo, Eis-Embaixadór Timor-Leste iha Xina, Bendito Santos Freitas.
Inklui, Eis-Embaixadora Timor-Leste iha Xina, Vicky Tehong, Reitóra IPDC, Me. Ervinia Martins Brito, Koordenadora Edukasaun Canossiana, Me. Guilermina Marsal, FDCC, Diretora Fundasaun Canossa, Me. Juvita da Costa, FDCC.
Jornalista : Nelia Fernandes
Editór : Rafy Belo
