Prezidente MAEKOM, Rui Manuel Castro. Imajen/Eugénio Pereira

DILI, 10 janeiru 2020 (TATOLI)- Impase polítika ne’ebé la’o iha rai laran lori nia impaktu boot ba lala’ok ekonomia rai laran.

Vise Prezidente Camara Comerçio no Industria Timor-Leste (CCI-TL), Rui Manuel Castro, hateten, indikadór ba lala’ok ekonomia iha rai laran komesa fraku  tanba atividade investimentu iha rai laran barak paradu dezde 2017 mai to’o 2019.

Rui Castro hateten, atu sala situasaun ne’e, lider nasionál sira tenke hamutuk ona no komunika malu atu  bele salva nasaun ne’e no salva ekonomia la bele mout.

Atu solusiona impase ne’e labele kontinua mosu iha tinan 2020 ba oin, Vise Prezidente CCI-TL ba asuntu Agrikultura Peska no Indústria Kriativa, Rui Castro, lidera sira hanesan maun boot Xanana, Taur Matan Ruak, Francisco Guterres “Lú Olo” ho Mari Alkatiri, tenke haree ba interese nasionál no interese povu ki’ik nian.

“Ita nia lider sira ne’e seidauk arrepende, ita hatene loja barak taka hanesan Supermerkadu Kmanek, no ami rasik redús traballadór tanba osan la iha. Lider sira tenke buka malu tuur hamutuk buka ko’alia ba malu, ita vinga malu la manan buat ida, úniku solusaun maka sira hamutuk, Timor ita hotu nian, tanba bainhira investimentu no dezenvolvimentu iha rai laran la la’o ne’e problema ba Timor-oan hotu,” hateten Rui Castro, hodi responde Ajénsia TATOLI  iha Loja Agrikultura Fatuhada, Dili, sesta (10/01/2020).

Problema boot seluk tan maka Rui identifika bainhira setór privadu taka, signifika ema sira ne’ebé hetan ona servisu sei lakon servisu no aumenta dezempregu iha rai laran.

Tuir nia katak, durante nasaun ne’e hasoru krize, investidór sira husi Xina maka aproveita fali oportunidade loke negósiu makroo no mikro hodi domina iha Timor-Leste.

Tuir nia haree katak, kona-ba Dotasaun Orsamentu Temporáriu (DOT) ka duo désimu ne’ebé Governasaun Taur Matan Ruak sei aprova iha Konsellu Ministru, semana ne’e, labele sai kultura ida atu salva de’it mákina Estadu hodi gasta ba saláriu vensimentu, beins servisu, transferénsia públika,  kapitál dezenvolvimentu, kapitál minor no esklui kompras beins ne’ebé tenke hein too orsamentu definitivu ou orsamentu aprova.

“Dua désimu ita labele halo hanesan tradisaun ida, se 2017, 2018 uza dua désimu ne’e hanesan lisaun ida ita tenki aprende no labele mosu tan iha governu ne’ebé ukun maioria ne’e la lójika,” nia kestiona.

Nia hatutan, investidór husi rai li’ur dala ruma atu mai investe iha Timor-Leste sira ta’uk, tanba Timor-Leste sofre beibeik krize polítika ne’ebé  afeta mós ba kualkér investimentu hotu- hotu.

“Se maka atu fiar ita, se ita nia estabilidade polítika no seguransa la estavel,” katak nia.

Atuál Diretór kompañia Cladotia FU halo komparasaun impase polítika 2017-2018 ne’e diferensa ho krize polítika 2006-2007 nian ne’ebé Maun Boot Kay Rala Xanana Gusmão ho ninia ukun brani hakat liu lei hotu- hotu hasai osan Estadu millaun $200-resin fó apoiu ba setór privadu hotu- hotu hamoris Projetu Pakote Referendu (PPR), fó projetu ba veteranu no projetu seluk tan para rekupera situasaun ekonomia rai laran.

Haree ba komparasaun krize ne’e, maka Rui konsidera katak, impase ida agora sei halo setór privadu barak sei taka atividade negósiu no traballadór barak sei lakon servisu, tanba setór privadu Timor-oan uitoan de’it maka loke indústria la dependénsia ba projetu estadu nian.

Hanesan setór privadu, Rui dehan, CCI-TL rasik aprezenta ona rekomendasaun ba Prezidente Repúblika, Primeiru Ministru atu hamutuk ukun hodi hadi’a estabilidade para lori povu no nasaun ba moris di’ak.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here