Sekretáriu Estadu Komunikasaun Sosiál, Merício Juvinal dos Reis Akara. Imajen Tatoli/Egas Cristovão

DILI, 09 janeiru 2020 (TATOLI) – Sekretáriu Estadu Komunikasaun Sosiál, Merício Juvinal dos Reis ‘Akara’, informa projetu dizitalizasaun Radiu Televizaun Timor-Leste Empreza Públiku (RTTL, EP) ne’ebé hetan apoiu hosi Governu Xina daudaun ne’e atinji ona pursentu 90.

“Ohin ha’u husu autorizasaun hosi Primeiru-Ministru, Taur Matan Ruak hodi mai vizita projetu ne’ebé agora atinji ona pursentu 90. Ida ne’e di’ak tebes tanba projetu ne’e la’o kapas los. Teknolojia mak ita instala agora avansadu liu nasaun seluk balun, tanba ne’e ita orgullu los”, dehan Akara iha fatin instalasaun torre RTTL iha Fatuahi, kinta ne’e.

Governante ne’e salienta, tuir planu iha fulan fevereiru tinan ne’e sei hala’o teste ba instalasaun, nune’e fulan tolu nia laran bainhira instalasaun la’o ho di’ak ona, bele lansa projetu refere ba públiku.

Iha sorin seluk Prezidente RTTL, EP, Francisco Gari, hateten instalasaun ne’ebé Governu Xina apoiu ne’e instala iha fatin tolu hanesan Fatuahi, Caicoli no Kutulau, Leorema, Munisipiu Liquiça.

“Instalasaun ba projetu dijitalizasaun ne’e ita bele hala’o teste ona iha fulan fevereiru agora, nune’e di’ak ita bele lansa ona hodi husik hela analog ne’ebé durante ne’e ita utiliza hela”, subliña Gari.

Entretantu, instalasaun ne’e hala’o hela hosi Kompañia Xina China Potevio Company Limited.

Jornalista: Hortêçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here