Komunidade atus resin maka dadauk ne'e konstrui uma iha mota ninin Comoro.Imajen Osoria Marques

DILI, 09 janeiru 2020 (TATOLI)-Autoridade Munisípiu Dili fó ona alarme ba komunidade sira atu evita harii tan uma iha mota ninin, no foho lolon iha área  Dili nian tanba fasil mosu dezastre naturaís hanesan rai monu no mota boot.

Adjuntu Prezidente Munisípiu Dili, José Ximenes Smith, hato’o preokupasaun ne’e relasiona ho família uma-kain 200-resin maka dadaun ne’e harii uma iha mota Comoro ninin entra ponte CPLP no Ponte Hinode Dili.

Adjuntu Autoridade Munisipio Dili, Jeca Filipe Smith. Imajen/Egas Cristovão

“Ami-nia ekipa hamutuk ho autoridade lokál sempre avizu no halo alarme beibeik nomós halo sosializasaun ba sira, maibé sira hakarak hela no prontu simu konsekuénsia,” informa, Jeca Smith ba Agência TATOLI, iha Mataduro, Dili, ohin.

Notísia Relevante:Família 200-resin Hela iha Mota Comoro Ninin Tanba Rai Laiha

Tuir nia, Munisípiu Dili laiha kompeténsia atu hasai komunidade sira hosi fatin ne’ebá maske sira hela iha área juridisaun Dili nian. Tanba ne’e, Jeca Smith husu ba Ministériu Justisa no Ministériu Obrás Públikas (MOP) atu fóti desizaun ba asuntu refere.

Administradór Interinu ba Postu Administrativu Dom Aleixo ne’e, apela ba komunidade sira iha Dili  hodi koopera ho governu no autoridade lokál atu labele harii tan uma iha mota ninin, rai lolon tanba sei fó ameasa ba ema nia moris.

Antes ne’e okupante mota Comoro, Pasquela de Sousa, hateten sira harii uma iha área mota comoro ninin tanba rai laiha.

“Ami hela iha mota ninin Comoro nian ne’e ami mak hakarak rasik no laiha ema ida mak haruka ami maibé nesesidade ekonomia mak obriga duni ami no rai laiha,” hateten Pasquela.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here