Diretór Jerál Pekuária no Veterinária, MAP Domingos Gusmão. Imajen/Florencio Miranda Ximenes.

DILI, 09 janeiru 2020 (TATOLI) – Diretór Jerál Pekuária no Veterinária Ministériu Agrikultura no Peska (MAP), Domingos Gusmão, hatete MAP garante peste suína afrikana ka african swine fever (ASF) sei la mosu tan iha tinan ne’e tanba uza ona sistema bio-seguransa.

 “Ami garante virus ne’e sei la mosu tan iha tinan ne’e (2020) tanba ita hahú esforsu hodi pelumenus ita-nia fahi sira agora la mate tan ona”, Diretór Jerál ba TATOLI iha knaar fatin Komoro, ohin.

Nia adianta MAP planeia hodi kontinua kontrola peste suína afrikana atu labele akontese fali hanesan iha tinan kotuk ne’ebé hamate fahi barak.

Númeru fahi ne’ebé mate iha territóriu Timor-Leste tuir dadus MAP nian kuaze rihun 16. “Foin daudaun mate barak ne’e tanba ita laiha preparasaun no ita-nia tékniku sira mós ita la orienta kona-ba ida ne’e, ne’ebé ita halo prevensaun baibain de’it, derrepente virus ASF tama makaas loos no akompaña mudansa klimátika ita labele halo buat ida. Maibé, ikus mai ita konsege hatún virus, ne’ebé to’o agora fahi la mate arbiru”, katak.

Hodi dehan MAP sempre garante, maski virus ASF ne’e to’o agora nia laiha vasina. “Maibé, ita iha modelu atu proteje fini fahi lokál no rasa sira ne’e liuhusi bio-seguransa atu atende nesesidade komunidade nia ekonomia no kultura”, afirma.

ASF mosu ona iha Áfrika iha tinan 100-resin liubá to’o agora ema espesialista hotu iha mundu buka hela nia vasinasaun, mas seidauk hetan.

Entretantu, peste suína afrikana ne’ebé foin mosu iha inísiu setembru to’o ohin loron kuaze halo erradikasaun másima no tuir dadus provizóriu agora laiha fahi mate.

Virus ne’e tuir teste labaratóriu makaas liu iha Dili, Baucau, Lautem, Liquiçá, Bobonaro no Munisípiu seluk ladún.

“Ita halo prevensaun ida makaas la’ós MAP de’it, maibé hamutuk ho nasaun parseiru sira hanesan Austrália no organizasaun Saúde Animál Mundiál sira diagnóstika no teste laboratóriu, moras ne’e kuaze atu laiha ona”, salienta.

MAP kontinua aplika sistema bio-seguransa hodi fó asisténsia téknika atu populasaun hakiak fahi tenke ho luhan, ho hahán di’ak inklui asegura nia saúde liuhusi medikamentu.

Domingos Gusmão adianta ASF ne’e jeralmente kona de’it ba fahi sira ne’ebé na’in husik de’it la’o livre. “Ami-nia kontrolu ba fahi sira iha luhan ne’e la mate no pois sira ne’ebé uluk vasina ne’e la mate tanba iha seguransa ba bio-seguransa, maibé fahi sira husik livre mak mate barak”, dehan.

Sobre dadus detalladu, nia dehan ekipa task force rekolla hela, ne’ebé iha fulan ne’e komesa hatama hotu atu haree totál fahi hira mak mate no porsentu virus ASF tun bá hira ka elimina ona inklui ekonomikamente populasaun lakon hira mak foin bele públika iha fulan oin.

“Ami identifika hela fahi mate hira no fó lakon ba ekonomikamente povu nian atu tau iha planu hodi bele apoia iha tinan 2020”, informa tan.

MAP ho Banku Áziatiku Dezenvolvimentu (ADB, sigla inglés), Food and Agriculture Organization (FAO) no Banku Mundiál halo hela peskiza ida adekuada atu identifika no halo estudu ba da’et virus ASF hahú oinsá no hatún ninia infesaun ne’e halo oinsá.

MAP hetan apoia husi ADB hodi kontrata ona espesialista moras fahi husi Filipina hodi hala’o estudu ho Organizasaun Saúde Animál Mundiál (OIE) atubele elimina virus ASF ne’e.

Notísia relevante : Virus ASF Hahú Menus Hafoin Hamate Fahi Rihun 16

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here