Arguido kazu omesídiu Metinaro konversa hela ho familia sira iha TDD. Imajen/Domingos Piedade

DILI, 08 janeiru 2020 (TATOLI) -Tribunal Distritál Dili (TDD), kuarta (08/01/2020), halo julgamentu ba kazu omisídiu simples ne’ebe mak hamate vítima Domingos Godinho, iha Metinaro iha loron 05 jullu 2019.

Tuir akuzasaun Ministériu Públiku (MP) katak, iha loron 05 jullu 2019, tuku 02:00 madrugada OTL, iha Aldeia Akadiru Laran, Suku Sabuli, Metinaro, Postu Administrativu Kristu Rei,  arguido nain rua; Adelino Marçal no Frederico dos Santos Barreto, asalta derrepente vítima Domingos Godinho ho nia kolega Hilario Saldanha no Alberto Amaral,  ne’ebé tuur halimar hela iha Merkadu Metinaro.

Husi aktu arguido sira nian ne’e rezulta Domingos Godinho mate fatin ho kanek lubun iha isin lolon tanba hetan sona ho tudik.

Ministériu Públiku akuza arguido nain rua ho artigu omisídiu simples ne’ebé previstu no punidu iha artigu 138 husi kódigu penal Timor Leste.

Iha audiénsia julgamentu ne’e  Tribunal atu rona testemuña sira nia deklarasaun, infelizmente testemuña la marka prezensa maske  notifika hotu ona.

Prosesu julgamentu ba kazu ne’e adia hikas ba loron 27 janeiru 2020, tuku 16.00 OTL no julgamentu nee rasik prezide husi koletivu  kompostu husi Juiza Maria Solana, Maria Modesta, Ministériu Públiku reprezenta husi Prokuradór, Pedro Baptista dos Santos no arguido nain rua hetan asisténsia legal husi advogadu privadu, Pedro Aparicio no Rui Antonio M.

Jornalista : Domingos Piedade Freitas

Editór       : Francisco Simões

 

HAKEREK NO HATÁN

Please enter your comment!
Please enter your name here