Logotipu UNTL.

DILI, 08 janeiru 2020 (TATOLI)–Pro-Reitór Asuntu Akadémiku UNTL (Universidade Nacional Timor Lorosa’e) informa katak prosesu ingresu ba kandidatu estudante sekundáriu finalista atu tama ba UNTL ne’e kompeténsia Ministériu Ensinu Superiór, Siénsia no Kultura (MESSK) nian.

“UNTL la halo prosesu ingresu ne’e maibé Ministériu Ensinu Superiór mak halo prosesu ne’e. Prosesu ne’e aprova ona husi Ministériu Ensinu Superiór, Siénsia no Kultura mak UNTL foin simu lista finál husi ministériu,” Pro-Reitór Miguel Maia dos Santos hateten, iha entrevista ho TATOLI, iha Parlamentu Nasionál, ohin.

Vise-Pro-Reitór ne’e dehan prosesu ne’e komisaun Asesu Ensinu Superiór mak hala’o prosesu ne’e. Agora parte UNTL nian aprezenta de’it mak total estudante na’in hira mak sei akumula iha kada departementu. Tanba ne’e husi lista adisionál ne’ebé universidade aprezenta ba MESSK hamutuk 3.800 itál ne’e hatun tiha ba 3.665 kandidatu.

“Ida ne’e mak lista fiksa ne’ebé ministériu aprova atu hetan ingeresu ba UNTL. Tanba sira mak halo prosesu kontrolu, supervizaun no ninia organizasaun. Ne’ebé, se mak diriji prosesu ingresu estudante foun ne’e Diretór Jerál Ministériu Ensinu Superiór, Siénsia no Kultura nian,” akadémiku UNTL ne’e dehan.

Agora, tuir akadémiku ne’e, husi 23 mil estudante Finalista ensinu sekundáriu ne’ebé kompete, sira ne’ebé atu hetan biban tama iha UNTL ne’e 3.665 de’it. Restu ne’e bele asesu fali ba universidsde privadu sira. Tinan ida ne’e rejime rua mak UNTL implementa mak rejime jerál no rejime espesiál.

Rejime jerál no espesiál ne’e katak bazea ba valór reál no rejime espesiál mak fó oportunidade ba estudante sira ne’ebé akaba eskola ensinu sekundáriu iha 2014-2018, Veteranu, oan husi veteranu, funsionáriu públiku inklui F-FDTL (Falintil-Forsa Defeza Timor-Leste no PNTL (Polísia Nasionál Timor-Leste) inklui defisiente sira.

Limitasaun ingresu ne’e, Pro-Reitór Miguel Maia dos Santos informa, bazeia ba estudu, avaliasaun no observasaun MESSK nian ba akontesimentu kauza tinan kotuk ne’ebé prosesu ingresu estudante foun ba UNTL ne’e sai problema boot no ikus mai tenke lori kazu ne’e ba to’o Parlamentu Nasionál (PN), ikus UNTL tenke simu hotu estudante sira ne’e.

Tan ne’e MESSK ho ninia kompeténsia husu ba UNTL atu aprejenta uluk kada departementu ida atu fo ninia númeru estudante na’in hira? Inklui kritériu ka rekizitu mínimu nian atu nune’e bele sai sasukat ida ba MESSK. Maibé, ministériu mós hatun ninia ekipa ida hodi husu informasaun ba departamentu sira bazeia ba númeru sira ne’e.

Laboratóriu Fasilita Akadémiku Sira

Iha biban hanesan, Pro-Reitór Asuntu Akadémiku UNTL, Miguel Maia dos Santos hateten katak laboratóriu sira fasilita akadémiku sira hanesan dosente no estudante sira hodi realiza prátika.

“Husi prosesu aprendizajen ne’e rasik iha volume matéria sira ne’e, balun ninia prátika sa’e teoria tuun, no balun fali iha balansu entre teoria no prátika, maibé balun fali teoria mais duke prátika,” nia dehan.

“Agora husi prosesu no preparasaun ne’ebé parte Universidade halo ona la’ós de’it ho laboratoriu bele ona garante kualidade estudante sira nian maibe prepara mós kondisaun sala-de-aula kompleta ho fasilidade hanesan kadeira atu estudante sira bele utiliza”.

Tanba ne’e, tuir Akadémiku UNTL ne’e katak tinan ida ne’e, UNTL iha ona edifísiu tolu mak konklui ona no tempu badak sei utilija. “Ida ne’e hanesan meius ida atu apoiu estudante sira bele simu materia ho di’ak,” Pro-Reitór Miguel Maia dos Santos tenik.

Iha fatin hanesan, Ministru Ensinu Superiór, Siénsia no Kultura, Longuinhos dos Santos, iha segunda (06/01/2019) hateten katak estudante ne’ebé sei asesu ba UNTL, parte MESSK deside ona katak estudante sekundária finalist hamutuk 3.875.

“Husi totál 3.875 estudante ne’e fahe ba parte rua. UNTL rasik sei presiza de’it 3.765 kandidatus estudante no Institutu Politékniku Betano (IPB) sei presija de’it 200 kandidatu estudante. Agora husi rejime jerál nian sei presiza de’it 2.654 no rejime espesiál nian 1.011 kandidatu”.

Ministru Longuinhos dos Santos hateten, husi númeru sira ne’e mós fahe ona ba kategoria rua rejime espesiál no rejime jeral. Husi rejime espesiál ne’e foka liu ba veteranu ho nia oan sira, defisiente, diplomata sira inklui sira ne’ebé mak idade tinan 23 ba leten. “Ita redús númeru kandidatu ne’ebé asesu ingresu ba Institutu Públiku ne’e tanba haree ba kondisaun atu nune’e bele garante kualidade iha prosesu ensinu aprendijazen,” governante ne’e dehan.

Instituisaun Ensinu Superiór Públiku, tuir governante ne’e katak tenke eleva duni ninia kualidade. Tanba ne’e mak Ministeriu tau preokupassun kona ba kondisaun sala-de-aulas, biblioteka, no dosente sira nian, entaun Ministériu husu atu UNTL tenke halo redusaun ba númeru estudante iha tinan 2019.

Agora redusaun ba númeru ida ne’e la’ós naran de’it, maibé Ministériu simu proposta husi parte UNTL rasik entaun MESSK hatun ninia ekipa ida hodi halo observasaun direita ba kondisaun ne’ebé iha. Nune’e mós MESSK halo uluk enkontru ida ho estrutura makro no mikro UNTL no IPB nian. Tanba ne’e mak hetan desijaun hodi desidi 3.865 kandidatu estudante ne’ebé atu tama ba instituisaun públika.

“Ne’eduni prosesu hotu ita hala’o ona espera katak antes janeiru ne’e ramata ita bele haruka ona rejultadu hotu ba Institutu Públiku rua ne’e atu nune’e labele atrazu kalendáriu akadémika nian,” nia espera.

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here