Sekretáriu Estadu Terras no Propriedades Mário Ximenes. Imajen/ António Goncalves.

DILI,08 janeiru 2019 (TATOLI)-Resultadu audénsia públika entre  Ministériu Justisa, Komisaun Revizaun Orsamentál Polítika (KROP) ho Komisaun A Parlamentu ne’ebé trata asunto lei no justisa, tersa horiseik,  konsege redús orsamentu millaun tolu-resin ba Ministériu Justisa iha tinan 2020.

Proposta antes ne’e, Ministériu Justisa prevee orsamentu ho montante millaun $ 22 maibé redús ba millaun $ 18.253 hodi ezekuta iha tinan ne’e.

Ministru Justisa Interinu atuál Sekretáriu Estadu Terras no Propriedades,  Mario Ximenes ba Ajénsia TATOLI, hafoin remata audénsia públika ne’e informa, maske proposta OJE ne’e hetan redusaun,  maibé nia konsidera verba orsamentu ne’e sei sufisiente atu ezekuta ba planu no programa ministériu nian.

“Proposta orsamentu Ministériu Justisa ne’ebé antes prevee milliaun $ 22 agora hetan redusaun ba milliaun $ 18.253,”katak Governante ne’e iha Parlamentu Nasionál.

Hosi  totál proposta orsamentu ne’e sei aloka ba saláriu no vensimentu millaun $ 5.117, bens no servisu millaun $12.271, kapitál menór rihun $ 671, kapitál dezenvolvimentu rihun $ 194.

Tuir planu Ministériu Justisa sei ezekuta orsamentu ne’e ba programa prioridade maka dezenvolve Sentru Formasaun Jurídika Judisiáriu, Diresaun Rejistu no Notariadu, Diresaun Terras no Propriedade liliu atu prodús sertifikadu rai ba sidadaun, dezenvolve servisu prijaun no planu sira seluk tan.

Entretantu, tuir proposta orsamentu 2020 ba Ministériu Justisa sei fahe ba diresaun sira maka hanesan gabinete ministru hamutuk rihun $ 198,  ba saláriu no vensimentu rihun $ 123 no bens servisu rihun $ 75, Gabinete Vise Ministru Justisa hamutuk rihun $ 120, ba saláriu no vensimentu rihun $ 95 no bens servisu rihun $ 25.

Ba Gabinete Sekretáriu Estadu Terras no Propriedades hamutuk rihun $ 144, Saláriu no vensimentu rihun $ 89, bens servisu rihun $ 55. Diresaun Jerál Adminsitrasaun Polítika no Justisa hamutuk rihun $ 93, aloka ba saláriu no vensimentu hamutuk rihun $ 63 no bens servisu rihun $ 30.

Gabinete Inspesaun no Auditória hamutuk rihun $ 149, saláriu no vensimentu rihun $ 83 no bens servisu rihun $ 66. Diresaun Nasionál Administrasaun no Financas hamutuk millaun $ 6.066, saláriu no vensimentu $ 222, bens servisu millaun $ 5.162 no kapitál menór rihun $ 671.

Diresaun Nasionál Asessória Jurídika no Lejislasaun rihun $ 376 aloka ba saláriu no vensimentu rihun $ 91 no bens servisu rihun $ 285. Diresaun Nasionál Diretu Umanu no Sidadania hamutuk rihun $ 158, aloka ba saláriu no vensimentu  rihun $ 112 no bens servisu rihun $ 46.

Diresaun Nasionál Rejistu no Notariadu hamutuk rihun $ 25 ne’ebé aloka de’it ba bens servisu. Diresaun Nasionál Servisu Prijaun no Reinsersaun Sosiál hamutuk millaun $ 2.824 aloka ba saláriu no vensimentu rihun $ 973 no bens servisu Millaun $ 1.785.

Aloka ba Sentru Formasaun Jurídika no Judisiária ho orsamentu hamutuk rihun $ 179, aloka ba saláriu no vensimentu $ 133 no bens servisu$ 47. Defensória Públika ho proposta orsamentu hamutuk millaun $ 1.608 ne’ebé aloka ba saláriu no vensimentu millaun $ 1.360 no bens servisu $ 195.

Jornalista:Nelson de Sousa

Editór:Francisco Simões

HAKEREK NO HATÁN

Please enter your comment!
Please enter your name here