Xefe Departamentu SMN, Belmerio Jeronimo. Imajen: Felicidade Ximenes

DILI, 08 janeiru 2020 (TATOLI)-Durante tinan-2019, hahú husi janeiru to’o dezembru, pasiente ne’ebé hala’o konsulta matan iha Sentru Matan Nasionál (SMN), HNGV (Ospitál Nasionál Guido Valadares) hamutuk rihun 18-resin.

“Entre 18 mil itál ne’e pasiente foun hamutuk atus hitu resin no pasiente ne’ebé mai kontrola fila fali hamutuk 11 mil itál,” relata Xefe Departamentu SMN, Belmerio Jeronimo ba jornalista sira iha nia kna’ar fatin HNGV, ohin.

Nia esklarese, husi totál pasiente sira ne’ebé mak ho problema matan, númeru ne’ebé mak boot ne’e mak sira ne’ebé haree la moos. Ho okúlu de’it salva ona sira-nia matan ne’e hamutuk atus hitu nolu resin no pasiente sira ne’ebé foun ho problema matan katarak ne’e mós maizmenus atus hitu resin.

“Durante operasaun tinan-2019 nia laran totál operasaun halo iha Sentru Matan hamutuk 1.376. Pasiente ne’ebé hetan operasaun entre númeru ne’e mak pasiente ne’ebé problema ho matan katarak iha atus sia resin mak hala’o ona operasaun”.

“Ami halo atividade la’ós iha sentru matan iha Dili deit maibé ami mós iha atividade outreach (peskiza) ba konsulta matan iha Munisípiu sira liuliu ba operasaun katarak sira hamutuk 358,” nia reforsa.

Xefe Departamentu SMN, Belmerio Jeronimo esplika, serbisu ne’ebé mak sira iha 2019 kompara ho tinan tolu kotuk (2016,2017,2018), sira laduun hasoru problema ne’ebé mak boot tanba sasán ne’ebé sira presiza sufisiente

“Ai-moruk sira ne’ebé ami uza atu halo operasaun no konsulta ne’e ami hetan suporta husi Ministériu Saúde no mós Servisu Autonomo Medikamentu Ekipamentu Saúde (SAMES) no saida de’it mak ami presiza ne’e sempre iha. Suporta ne’ebé ami iha tinan-2019 hetan aleinde husi Ministériu Saúde, hetan mós husi OMS (Organizasaun Mundiál Saúde) liuhusi atividade outreach”.

Prodús Doutór Matan Na’in Haat

Xefe Departamentu SMN, Belmerio Jeronimo relata mós katak durante hetan apoiu husi parseiru dezenvolvimentu SMN nian, SMN uza mós apoiu sira ne’e hodi prodús doutór matan (oftamolojista) na’in haat iha nível post-graduasaun. “Banhira ami halo atividade outreach hanesan transporte Ministériu Saúde mak suporta maibé tinan rua ba kotuk ne’e ami uza deit karreta Ospitál Nasionál Guido Valadares nian”.

Nia informa, planu SMN nian ba 2020 mak iha fevereiru nia laran no kada fulan ekipa SMN sei tuun ba komunidade hodi halo tratamentu ba matan.

“Ami-nia enfermeiru sira mak sei mínimu liu tanba enfermeiru sira ne’ebé mak servisu iha ne’e maioria kontratadu entaun sira ne’ebé mak permanente ne’e iha na’in tolu ka na’in haat de’it”.

“Enfermeiru ne’ebé iha sala operasaun ami presiza tan na’in rua ka tolu hanesan ne’e tanba bainhira ami halo tiha atividade outreach iha Munisípiu sira entaun iha ne’e mós atividade loroloron pasiente sira mai konsulta matan iha hela de’it entaun ami presiza tan enfermeiru sira,” xefe departamentu SMN ne’e relata.

Entretantu, pesoál saúde ne’ebé halo knaar iha SMN, HNGV ne’e hamutuk na’in 20.

Jornalista    : Felicidade Ximenes

Editór          : Rafy Belo

HAKEREK NO HATÁN

Please enter your comment!
Please enter your name here