Edifisiu Tribunál Rekursu. Imajen/Espesiál

DILI, 07 janeiru 2020 (TATOLI) – Tribunal Kámara  Kontas ne’ebé prezide husi Prezidente Tribunal Rekursu, Deolindo do Santos, ohin, la konsege foti desizaun final ba prosesu administrativu rezultadu auditoria husi Ministériu Agrikultura no Peska (MAP) tanba sei hein hela dokumentu relevante balun husi Ministériu Finansas.

Rezultadu auditoria husi MAP ne’e deskonfiansa halakon osan Estadu ho valór $14,000,00 lakon iha MAP.

Kazu ne’e, Tribunal notifika akuzadu funsionáriu kargu xefia nain tolu iha MAP, kompostu husi akuzadu LBF, MM ho JM.

Juis Konselleiru atuál Prezidente Tribunal Rekursu, , Deolindo dos Santos, hateten, prosesu ne’e tribunal labele kontinua tanba parte Ministériu Finansas seidauk manda dokumentu relatóriu orijinál nian kona-ba orsamentu fundu kontinjénsia hosi Ministériu Agrikultór no Peska nian.

“Prosesu ne’e tuir loloos ohin ita ba ona faze alegasaun final, maibé bainhira tribunal konfirma parte governu liuhusi Ministériu Finansas seidauk fó dokumentu original mai,” informa Deolindo dos Santos iha audiénsia Tribunal Rekursu, Caicoli, Dili.

Kazu ne’e rejistu ho númeru prosesu 0072/16.TRDIL, 01/2016/TR-37/15, ba prosesu administrativa ne’ebé bolu responsabilidade finanseiru reintegratoriu.

Tuir despaixu Tribunal Kámara da Kontas nian, katak prosesu ne’e sei alega iha loron 10 Fevereiru 2020, tuku 14:00 lokraik, tanba sei fó prazu loron 20 ba governu liuhusi Ministériu Finansas atu hato’o relatóriu orijinál ba dokumentu ne’ebé tribunal husu.

Defensór Públiku, Nelson Borges, afirma katak prosesu ne’e prosesu administrativu ida, ne’ebé mak Parlamentu Nasionál iha tinan 2011 hato’o pedidu mai iha Kámara de Kontas, hodi halo auditoria ba iha ministériu agrikultura no peska.

Parte Ministériu Públiku ( MP) husu ba mandadu sira atu fó sansaun sansionatoriu no sansaun reintegratoriu ba fundus apoiu dezenvolvimentu agrikultura nian, iha tinan 2011-2012 ne’ebé MAP rasik apoiu ba povu agrikultór sira iha area rural.

Total orsamentu ba prosesu ne’e iha faze tolu, kompostu husi faze primeiru hanesan iha responsabilidade reintegratoriu nian hamutuk $114,000,00, ida seluk fundu kontinjénsia nian iha $8,700,00, no kona-ba despeza alokasaun viajen nian hamutuk $4,000.00.

Ba prosesu ne’e, Tribunal Kámara da Kontas  hahú prosesa husi Outubru 2019, ne’ebé prezide husi juis konselleiru atuál prezidente Tribunal Rekursu, Deolindo do Santos, Ministériu Públiku reprezenta prokuradór Pascácio de Rosa Alves, no akuzadu sira hetan asisténsia husi Defensór Públiku na’in tolu, kompostu husi Marçal Marcarinhas, Germano Ramos ho Nelson Borges.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here