Ministru Transporte no Komunikasaun, José Agostinho da Silva. Imajen/Antonio Goncalves

DILI, 07 janeiru 2020 (TATOLI) – Proposta Orsamentu Jerál Estadu (OJE) hosi Ministériu Transporte no Komunikasaun (MTK) ne’ebé antes ne’e hamutuk millaun $21,747, hetan redusaun millaun $10-resin hosi Komité Revizaun Orsamentál Polítika (KROP).

“Orsamentu anteriór ho valór millaun $21 maibé hetan redusaun ba millaun $10.7”, Ministru Transporte no Komunikasaun, José Agostinho da Silva, ba jornalista sira hafoin audiénsia ho Komisaun E ne’ebé trata asuntu infraestrutura, komérsiu no indústria iha Parlamentu Nasionál, ohin.

Iha ámbitu audiénsia, MTK hetan apresiasaun hosi Komisaun E kona-ba proposta OJE 2020 ho valór millaun $21,747 ne’ebé tun ba millaun $10.787, nune’e ministru afirma katak maski iha redusaun sei la fó impaktu ba funsionamentu serbisu ministériu nian.

Proposta orsamentu millaun $10.787 MTK aloka de’it ba kapitál dezenvolvimentu hamutuk millaun $3,793, saláriu no vensimentu millaun $1,496 no bens no servisu millaun $5,499. Entretantu, ministru fiar katak orsamentu ne’e bele responde ona nesesidade ministériu nian.

Antes ne’e, iha proposta OJE 2020 ne’ebé Governu retira husi Parlamentu Nasionál ho montante biliaun $1,950, orsamentu ba MTK hamutuk millaun $21,747 ne’ebé aloka ba saláriu no vensimentu millaun $1,496, bens no servisu millaun $6,999, transferénsia públika millaun $1, kapitál menór millaun $1 no kapitál dezenvolvimentu millaun $11,253.

Jornalista : Natalino Costa

Editora : Maria Auxiliadora

 

HAKEREK NO HATÁN

Please enter your comment!
Please enter your name here