DILI, 07 janeiru 2020 (TATOLI) –Komisaun Revizaun Orsamentu (KRO) ku’a orsamentu Ministériu Edukasaun, Juventude no Desportu (MEJD) hamutuk $24.519,533 mil no agora manten ho millaun $89,511,043. Redusaun ne’e husi totál proposta orsamentu adiosionál purvolta millaun $114.030,576 ne’ebé mak MEJD aprezenta ba iha Parlamentu Nasionál (PN), antes ne’e, hodi ezekuta ba programa prioridade MEJD nian iha 2020.
Ministra Edukasaun, Juventude no Desportu (MEJD) hateten katak depois orsamentu adisionál ne’e hetan alterasaun, nia konsidera MEJD hetan sofre boot tanba programa prioridade sira ne’ebé trasa ona sei la bele ezekuta ho di’ak.
Alterasaun orsamentu MEJD ne’e boot liu mak transferénsia públika ho kuantia purvolta millaun $21. Orsamentu ne’e atu aloka ba infraestrutura bázika kona-ba konstrusaun no reabilitasaun eskola. Iha mós kortes seluk mak atividade viajen estranjeiru. Antes ne’e aloka 100 mil maibé ikus mai KRO ku’a ba 50 mil.
“Iha parte ida ne’e ami triste tebes tanba iha 2019 MEJD hahú muda ona polítika oinsá atu uza orsamentu ba viajen estranjeiru la’ós ba de’it membru governu ka funsionáriu sira de’it maibé loke mós ba estudante sira,” Ministra Dulce de Jesus dehan ba deputadu Komisaun G, iha Parlamentu Nasionál, ohin.
Nia dehan, MEJD hasai orsamentu boot hodi preve ba atividade estudante sira nian uainhira hetan oportunidade atu ba tuir kompetisaun iha rai li’ur. Realidade grupu estudante sira hetan ona apoiu orsamentu husi MEJD rasik hodi ba tuir kompetisaun iha malázia, Qatar no Tailándia.
Nune’e mós liuhusi orsamentu refere ministériu haruka ona profesór sira ne’ebé mak iha koñesimentu di’ak ho lian inglés ba tuir ona formasaun iha rai li’ur. Nune’e kona-ba servisu seluk nian mós kortes tan millaun rua itál inklui viajen lokál millaun tolu resin.
Ho alterasaun orsamentu ida ne’e, Ministra Dulce konsidera afeta tebes ba planu ne’ebé mak ninia parte trasa ona, sira sei labele atinji programa ne’e kompletu tanba limitasaun orsamentu ne’ebé la nesesáriu atu ezekuta.
Notísia relevante:Ezekusaun Orsamentu MEJD Atinje Ona 74%
Jornalista : Tomé Amado
Editór : Rafy Belo