Ministru Transporte no Komunikasaun, José Agostinho da Silva. Imajen/Antonio Goncalves

DILI, 07 janeiru 2020 (TATOLI) – Governu liuhosi Ministériu Transporte no Komunikasaun (MTK) sei konvoka reuniaun ho ajénsia travel atu haree presu tikete aviaun nian ne’ebé konsidera karun.

“Bainrua, 09 janeiru, ami sei halo enkontru ho ajénsia travel ne’ebé fa’an tikete aviaun ho karun, husu sira, tanba saida maka tikete karun”, Ministru MTK, José Agostinho da Silva, ba jornalista sira hafoin hola audiénsia ho Komisaun E iha Parlamentu Nasionál, ohin.

Ministru salienta katak funsionáriu, deputadu no sidadaun sira seluk maka halo viajen bá rai-li’ur bainhira akontese presu billete liu fali $230 ne’ebé determinadu.

“Ami sei halo enkontru ho ajénsia travel sira ne’ebé fa’an billete aviaun atu haree tuir akordu presu ne’ebé ho $230, ita presiza hatene presu tikete ne’ebé ho presu aas liu fali ida ne’e”, dehan.

“Ha’u orienta ona ba Autoridade Aviasaun Sivíl atu bolu hotu ajénsia travel sira ne’ebé maka durante ne’e fa’an billete aviaun ba instituisaun Governu, tanba saida maka tenke akontese folin tikete karun”, afirma.

Tanba ne’e, bazeia ba responsablidade ministériu nian maka oinsá estabelese akordu G to G (Governu ho Governu) ne’ebé liuhosi Autoridade Aviasaun Sivíl Timor-Leste hodi aplika presu tikete ho presu mínimu no másimu.

Tuir presu ne’ebé maka define ona iha akordu katak operasaun aviaun iha Timor-Leste ho presu mínimu maka $130 no másimu $230.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here