Vise Ministra Saúde, Elia Antónia Araújo dos Reis Amaral. Imajen Tatoli/Hortençio Sanchez

DILI, 06 janeiru 2020 (TATOLI)-Ministériu Saúde (MS) prevee orsamentu hamutuk 59 millaun iha Orsamentu Jerál Estadu (OJE) 2020 nian maibé redús tiha ona millaun tolu resin tanba ne’e agora tun ba millaun 56.

Orsamentu ne’e sei aloka ba iha kapitál menór, transferénsia públika, kapitál dezenvolvimentu, no mós ba profisionál saúde sira.

“Orsamentu ne’e sufisiente no ita hein hodi submete ba iha Parlamentu Nasionál hodi halo aprovasaun,” dehan Vise-Ministra Kuidadu Saúde Primária, Elia dos Reis Amaral ba media sira iha Parlamentu Nasionál (PN), ohin.

Governante ne’e informa katak prioridade MS ba tinan ida ne’e mak sei kontinua ho planu estratéjiku dezenvolvimentu nasionál. Dahuluk, ita sei halo prontidaun servisu nian hanesan iha postu saúde, sentru saúde balun ne’ebé presiza hadi’a duni.

Em termos de administrasaun, atendimentu no mós ita sei harii fila fali postu saúde, sentru saúde ne’ebé mak dook husi ita-nia populasaun sira, ita bele konstrui fila fali. Postu saúde ne’ebé ita iha planu atu harii ba tinan ida ne’e mak 15 ba leten,” Vise-Ministra, Elia dos Reis Amaral informa.

“Agora daudaun ita tama ona ba iha orsamentu duodesimu maibé sei la iha impaktu ba servisu saúde nian,” Elia garante.

Jornalista    : Felicidade Ximenes

Editór          : Rafy Belo

HAKEREK NO HATÁN

Please enter your comment!
Please enter your name here