Reitor Institutu Profissional de Canossa (IPDC) Madre Ervinia Brito. Imajen/TATOLI

DILI, 06 janeiru 2020 (TATOLI)-Reitora Ensinu Superiór Privadu, IPDC (Instituto Profissional de Canossa), Ervinia Martins Brito informa katak IPDC Planeia atu loke tan departamentu Ospitalidade no Turizmu.

“Ami hanoin hela ida ne’e, ida ne’e hanesan ami-nia mehi,” hateten Reitora IPDC, Ervinia Martins Brito iha nia kna’ar fatin Canossa Manleuana, Dili, ohin.

Reitóra IPDC ne’e aumenta, kona-ba rekursu umanu, profesór sira hanorin jestaun administrativa kuaze lubuk ida iha ne’ebá buat báziku. Ezemplu, to’o semester haat ne’e, matéria sempre baziku sira mak barak liu. “Depois espesífiku ne’e ita rekruta tan ema na’in hira, ne’ebé para bele mai fortalese tan haforsa liután, iha parte área espesífika nian”.

“Ne’e ami-hanoin, ezemplu ita rekruta tan ema na’in ha’at ka lima atu bele tan saida, la’ós matéria umum (jerál) sira hanesan fundamentál ba língua ka matemátika, estatistika no sira seluk ne’e profesor iha ne’e iha hela,” katak Manorin na’in ne’e.

Reitora IPDC ne’e informa mós katak, liga ba ospitalidade agora daudaun IPDC iha sentru sira iha Manatuto, Suai no Baucau, agora atu loke tan iha Atauro. Sentru kursu tinan ida ba ospitalidade nian ne’e iha tiha ona, Maliana tan, ne’e iha hela sentru ne’ebé mak iha SEFOPE (Sekretáriu Estadu Formasaun Profesionál no Empregu) nia okos.

“Ami haree iha, se ami loke ida ne’e sei iha oportunidade ba ami tanba ami-nia ema iha terenu (lapangan) iha hela. Sira, tinan ida agora hein de’it ba oin, ita serbisu hamutuk internál oin nusa, iha posibilidade ba ami oinsá, tanba ema sira mai tinan ida hasai kursu iha ne’ebá tanba hetan apoiu alende SEFOPE no mós husi Ajénsia internasionál”.

“Kursu tinan ida ne’e sira halo graduasaun hotu sira ba ona, iha tinan ida ne’e sira tenke oinsá mak hatene hadi’a kama no simu ema ka hatene halo dose no te’in ruma; buat hotu hanesan ami mehi, iha planu ona ba oin kurríkulu oinsa,” katak Reitóra IPDC.

Maske nune’e, molok atu realiza planu loke departamentu ospitalidade no turizmu, IPDC sei aprezenta ba iha Fundasaun Canossa hodi hetan aseitasaun.

“Se la aseita, parese dehan mungkin imi estuda fali to’ok jurusan (kursu) foun, ida ne’e iha tiha ona, ida ne’ebá iha ona, entaun ami tur hamutuk fali haree hamutuk fali ida ne’ebé mak ita bele,” nia konklui.

Entretantu, antes atu aprezenta kursu rua ne’e ba Fundasaun Canossa, tuir reitora katak parte IPDC realiza uluk estudu viabilidade tanba konsidera katak IPDC eziste ona tinan 16 no presiza dezenvolve tan.

 Jornalista : Nelia Fernandes

Editór        : Rafy Belo

 

HAKEREK NO HATÁN

Please enter your comment!
Please enter your name here