Ministra Finansa en-ezersísiu, Sara Lobo Brites. Imajen Tatoli/ Egas Cristóvão

DILI, 06 janeiru 2020 (TATOLI) – Ministra Finansa ein funsaun, Sara Lobo Brites, hatete parte Ministériu Finansa (MF) prepara ona Dotasaun Orsamentál Temporária (DOT)  janeiru 2020 no semana ne’e sei aprezenta iha Konsellu Ministru (KM).

Nune’e, atuál Vise-Ministra Finansa ne’e afirma, hein desizaun KM maka bele distribui ba ministériu no instituisaun Estadu hotu.

“Kona-ba Dotasaun Orsamentu Temporária ou bolu doudésimu, semana ne’e sei aprezenta ba Konsellu Ministru no Konsellu Ministru halo desizaun hafoin distribui ba instituisaun Estadu hothotu”, Sara Lobo Brites informa iha Parlamentu Nasionál, ohin.

Kona-ba montante DOT, governante ne’e dehan seidauk hatene loloos tanba sei deside hamutuk iha KM.

“Ha’u labele hateten lai ninia montante tanba sei aprezenta lai ba iha Konsellu Ministru para diskute uluk, hakarak konsidera hotu kategoria lima ne’e ou kategoria balu de’it maka konsidera ne’e depende ba desizaun Konsellu Ministru”, Sara Lobo Brites afirma.

Sara esplika, tuir esperiénsia tinan rua kotuk, kategoria sira ne’ebé konsidera iha rejime duodésimu mak saláriu no vensimentu, sasán no servisu, transferénsia públika no kapitál dezenvolvimentu no kapitál menór esklui tanba ne’e kompra ne’ebé tenke hein to’o orsamentu definitivu.

Ministra Finansa interina ne’e salienta, previzaun ba utilizasaun DOT depende ba dinámika diskusaun Orsamentu Jerál Estadu (OJE) 2020 nian, tanba diskusaun ba OJE ne’e durante fulan ida tomak.

“Se submete ba Prezidente Repúblika iha inísiu fevereiru, Prezidente mós tuir lei iha tempu fulan ida para analiza, entaun bele to’o marsu ou abríl, tanba depois Prezidente Repúblika promulga mós tenke halo instalasaun ba sistema, dekretu ezekusaun ne’ebé bele lori tan tempu uitoan”, katak.

Entretantu tuir ajenda, Parlamentu Nasionál (PN) hahú Audiénsia Públika ba Proposta Lei foun Lei no.9/V (2a) Orsamentu Jerál Estadu (OJE) ho montante biliaun $1,668, durante loron lima, hahú iha segunda (06/01) to’o sesta (10/01).

Nune’e, iha loron ne’ebé konklui audiénsia, komisaun sira elabora relatóriu paresér durante loron lima, hafoin iha loron 14 janeiru komisaun sei aprezenta relatóriu ba meza PN.

Tuirmai, diskusaun no votasaun iha jeneralidade sei realiza durante loron 3, hahú hosi 15 to’o 17 janeiru.

Nune’e mós, diskusaun no votasaun iha espesializada no finál global sei realiza durante loron 10, hahú hosi 20 to’o 30 janeiru.

Hafoin konklui, Redasaun Finál Proposta Lei OJE 2020 foun sei haruka ba Prezidente Repúblika, Francisco Guterres Lú Olo, iha 31 janeiru.

Sobre utilizasaun duodésimu tanba Timor-Leste daudaun ne’e seidauk iha OJE 2020. Regra no prosedimentu aplikasaun rejime duodésimu, instituisaun Estadu hotu presiza prepara DOT bazeia ba prinsípiu rua mak hanesan; dotasaun orsamentál kobre de’it despeza ida durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define tiha ona tuir lei orsamentál jerál Estadu númeru 13/2016.

PN Sei Debate Proposta Lei OJE 2020 Foun ho Karakter Urjénsia

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here