Agência Cable Beach Resort Husi Broome General Manager, Stuart Kentish (Loos) Intervista hela ho Traballdór Timor-Leste. Imajen/ Tatoli Egas Cristovão

DILI, 06 janeiru 2020 (TATOLI) – Ajénsia Cable Beach Resort hosi Austrália rekruta traballadór timoroan hamutuk 26 atu bá serbisu iha Austrália iha área ospitalidade.

“Ajénsia hosi Cable Beach Resort hosi Broome West Australia mai halo rektrutamentu ba timoroan na’in-26, atu báserbisu iha Australia”, Adidu Traballadór Timor-Leste ba Australia dehan bainhira akompaña timoroan na’in-26 ne’ebé tuir teste orál iha Hotel Novo Turismo, ohin.

Liuhosi teste ne’e, adidu haksolok tanba, karik timoroan na’in-26 maka iha abilidade durante entrevista, liuhosi resposta di’ak, entaun ajénsia sei foti na’in hirak ne’e hotu, maibé se la’e, ajénsia bele foti na’in-10 ka 15, maibé konforme ba rezultadu teste orál ne’ebé ho lian inglés.

Antes ne’e, iha 2013, SEFOPE fó ona teste ba timoroan na’in-26, hirak ne’e iha ona lista tuan hosi work ready full, programa seasonal worker nian maibé nunka hetan oportunidade bá serbisu iha Austrália, tanba tinan hirak liubá fó prioridade ba ortikultura de’it, maibé tinan ne’e, ajénsia husu traballadór atu bá serbisu iha área ospitalidade nian.

“Tanba ne’e ami manda sira-nian profile bazeia ba shortlist ne’ebé ajénsia sira haruka mai, ami mós fó tuir kedan kuantidade ita iha, tanba ne’e ohin ajénsia sira husi Austrália mai rasik halo teste ba ita-nia maluk sira”, dehan.

Adidu hateten timoroan hirak ne’e sei bá serbisu iha Austrália durante fulan-neen to’o fulan-sia bazeia ba programa seasonal worker, nune’e nia sei kontinua halo negosiasaun atubele aumenta númeru traballadór iha otelaria no ortikultura nian.

Fim de janeiro, ha’u sei bá fali Austrália hodi kontinua negosia, promove ita-nia maluk timoroan ba ajénsia sira hodi aumenta númeru haruka timoroan bá serbisu iha Austrália liuliu iha área ospitalidade no ortikultura”, promete.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here