Sekretáriu Estadu Juventude no Desportu, Nélio Isaac Sarmento, entrega tasa rotativa ba kapitaun kampionatu klubu Tokodede, Lecsy, iha enseramentu tasa Komandante Nino Konis Santana, ne’ebé hala’o iha saudozu nia moris fatin, aldeia Vero, suku Tutuala, postu administrativu Tutuala, munisípiu Lautein, ohin. Imajen Tatoli/Rita Almeida

TUTUALA, 29 dezembru 2019 (TATOLI) – Sekretáriu Estadu Juventude no Desportu (SEJD), Nélio Isaac Sarmento, ohin fahe prémiu ba kampionatu sira ne’ebé partisipa tasa rotativa Komandante Nino Konis Santana iha saudozu nia moris fatin, aldeia Vero, suku Tutuala, postu administrativu Tutuala, munisípiu Lautein.

Manan na’in ba primeiru lugar hosi klubu União Tokodede, hetan osan ho valór dolar 1000, inklui tasa permanente.

Enkuantu segundu lugar monu ba FC. Jona Louro Nairete, ho osan dolar 600. AC. Mayluan hetan terseiru lugar ho osan dolar 400.

Membru governu ne’e iha ninia mensajen kongratula manán nain sira, komisaun organizadora, família no sira seluk ne’ebé kontribui ona uitoan ka barak, nune’e atividade la’o to’o ramata.

Hanesan sekretáriu Estadu, Nélio Isaac kompromete kontinua apoiu atividade desportiva, tanba ne’e husu ba autoridade munisipál, komisaun organizadór no família atu kontinua jogu ne’e kada tinan, inklui jogu sira seluk hanesan voleibola no basketbola.

“Imi Tutuala oan sira la’ós kontente ba atividade ne’e de’it, maibé imi tenke orgullu tanba durante fulan rua anima ona joven sira no halo rame ona kapitál munisípiu Lautein”, katak.

Nia mós husu ba joven sira atu hadok án hosi violénsia, maibé oinsá hatudu talentu atu loron ida bele hamorin Nasaun nian-naran iha mundu.

Vise Prezidente Komisaun Organizadora, Delcio Guimaraes, iha ninia relatóriu haktuir atividade ne’e hetan apoiu orsamentu ho totál dolar 3000 no osan rejistu dolar 100 hosi klubu 31 ne’ebé partisipa.

Apoiu seluk mai hosi loja Dilimart, W Four, Casa Agrikultura, Lucky Market, familía.

Oportunidade ne’e parte autoridade lokál, seguransa no mós reprezentante loja Dilimart ne’ebé marka prezensa hato’o kompromisu, kontinua apoia atividade ne’e kuandu realiza tinan oin.

Jornalista: Rita Almeida

Editór      : Rafy Belo

HAKEREK NO HATÁN

Please enter your comment!
Please enter your name here