Grupu deskoñesidu sobu prezépiu iha Aldeia 12 Novembru, Suku Comoro, Postu Administrativu Dom Aleixo, Munisípiu Dili. Imajen/Eugénio Pereira.

DILI, 27 dezembru 2019 (TATOLI) – Polísia Nasionál Timor-Leste, Eskuadra Komoro hamutuk ho Konsellu Polisiamentu Komunitáriu (KPK),  iha natal kalan loron 24 fulan-dezembru 2019, detein joven na’in ualu hodi submete ba prosesu investigasaun, tanba lanu hodi estraga prezépiu ne’ebé harii hosi komunidade.

Kazu ne’e akontese iha aldeia 12 Novembru, Suku Komoro, Postu Administrativu Don Aleixo Munisípiu Dili, iha tuku 20:00 Otl.

Polísia Eskuadra Komoro Dili, ho Autoridade KPK to’o kedas fatin akontesimentu hodi halo intervensaun ba konflitu ne’e no konsege suspeitu detein na’in ualu hodi submete ba prosesu investigasaun.

Tuir komunidade, Afonso Hornay, nu’udar na’in ba prezépiu ne’e esplika, kazu konflitu ne’e akontese bainhira mosu desentendimentu idea to’o baku malu entre joven sira hodi  estraga prezépiu, imajen pai natal, kosok oan Jesus Kristu, lampu  ho koluna.

“Joven sira ne’e baku malu tanba lanu todan to’o ataka uma prezépiu natal mós sira baku rahun hotu, no polísia to’o kedas fatin hodi detein suspeitu na’in ualu (8) no joven balun halai polísia sei buka tuir hela”,  dehan Afonso ba TATOLI, foin lalais.

Tuir vítima ne’e katak suspeitu sira ne’e maihosi grupu deskoñesidu sira ne’ebé dadaun ne’e eziste iha suku ne’ebá.

“Hanesan joven ami lamenta ho atetude autór sira nian, tanba prezépiu ne’e ami juventude bairru ne’e harii ho objetivu atu anima bairru 12 Novembru tomak bele festeza loron boot natal no tinan foun 2020 bele la’o iha ambiente dame, maibé ema deskoñesidiu mai hamosu fali violénsia tanba ne’e, ami husu polísia atu prosesa kazu ne’e tuir lei”, Afonso lamenta tan.

Nia dehan, natal hanesan momentu importante ida ba sarani Katólika iha mundu inklui Timor-Leste atu selebra ho domin no dame la’ós atu hamosu konflitu hodi kria instabilidade iha komunidade nia leet.

Entretantu, TATOLI tenta konfirma kazu ne’e ho Segundu Komandante PNTL,  Munisípiu Dili, Superintendente Xefe, Euclides Belo, maibé  seidauk bele fó komentariu ba kazu ne’e.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here