Prezidente TATOLI, I.P, José da Costa. Imajen Tatoli/Egas Cristóvão.

DILI, 27 dezembru 2019 (TATOLI) – Prezidente Konsellu Diretivu Ajénsia TATOLI, I.P, José da Costa, iha okaziaun lansamentu Livru “TATOLI Nia Ain Le’ut” no Livru Foto “LALATAK” iha edifísiu Faról, relata katak iha 2019, totál vizitante sira ba portál ajénsia nian hamutuk 13,843,284.

Númeru asesu portál TATOLI.

“Vizitante sira ba portál TATOLI nian, iha janeiru 2019 sa’e hosi (tokon) 6,236,486 ba (tokon) 13,843,284 iha novembru 2019, nune’e númeru vizitante sira sa’e kuaze porsentu 47 kompara ho 2018”, José da Costa liuhosi diskursu iha ámbitu lansamentu livru, ohin.

Ajénsia TATOLI iha ona funsionáriu hamutuk 42, númeru hirak ne’e, na’in-31 maka dedikadu ba serbisu redasaun ne’ebé lidera hosi Diretora Ezekutiva, Rita Almeida.

Tuir mandatu ne’ebé estatutu haruka katak publikasaun TATOLI tenke ho karater multimedia no multi-língua, nune’e TATOLI konsege ativa ona notísia iha lian-portugés no inglés aléinde tetun, maske ho porsaun ne’ebé sei uitoan tebes, ho totál notísia 95 iha portugés sura husi agostu mai dezembru, notísia 54 iha inglés sura husi outubru mai dezembru.

Enkuantu, publikasaun vídeo iha youtube, dezde maiu 2019 to’o ohin loron, TATOLI konsege publika ona hamutuk 36 ho totál ema ne’ebé subskreve hamutuk na’in-375, ho totál ema viewer ka haree ona publikasaun vídeo entre períodu ida ne’e hamutuk 21,680.

“Númeru ida ne’e karik la’ós ideál liu, maibé se kompara ho kondisaun ne’ebé TATOLI enfrenta (la’ós atu halo auto-defeza), maibé koko ona ho másimu posivel tuir kbiit ne’ebé iha, nune’e mós TATOLI kompromete atu kontinua hadi’a no prodús barak liután iha tinan oin”, katak.

Aléinde ne’e, nia konsidera katak orsamentu ne’ebé Governu aloka ba TATOLI, la’ós puramente despeza anuál ne’ebé mohu leet maibé ajénsia iha hanoin katak orsamentu ne’ebé alokadu nu’udar investimentu ida ka saida maka TATOLI konsege fó hikas fali ba Estadu.

Tanba ne’e, ekipa sira iha TATOLI, simu ona orientasaun klaru no hatene ho didi’ak tebes katak 2020 sei hasoru situasaun foun no trajetu ida husi prosesu evolusaun maka tenke rekolla reseita hamutuk porsentu 2,5 husi totál despeza ne’ebé alokadu.

Hodi dehan bainhira refere ba orsamentu ne’ebé prepara daudaun ba TATOLI iha 2020 ho totál $534,000 mak to’o dezembru 2020, TATOLI tenke rekolla reseita hamutuk $13,350. “Karik ki’ik no sei la fasil ho kondisaun ekonomia iha ita-nia rain, maibé TATOLI kompromete atu esforsu an, no valór ida ne’e sei komprova iha dezembru tinan oin, bainhira ita hasoru malu fali iha fatin ida ne’e”, Prezidente salienta.

“Iha nivel makro, ami bele dehan katak TATOLI halo ona balansu iha publikasaun notísia no liuliu informasaun hirak ne’ebé ita-nia sidadaun sira hein atu asesu ho lalais no kredivel”, afirma.

José da Costa Agradese STL-SEKOMS Ne’ebé “Sita” Notísia TATOLI

Iha lansamentu ne’e, Prezidente TATOLI agradese bá mídia na’in, liuliu Suara Timor Lorosa’e (STL), ne’ebé hahú ona sita notísia Ajénsia TATOLI nian, kuaze loroloron hodi prienxe iha jornál hodi fó sai ba públiku, inklui Diresaun Nasionál Diseminasaun Informasaun (DNDI) hosi Sekretáriu Estadu Komunikasaun Sosiál (SECOMS, sigla portugés), ne’ebé konsege koloka mós notísia TATOLI nian iha boletin SEKOMS nian.

“Ba kolega mídia na’in sira, liuliu ba STL, hahú ona “kutip” ka kópia TATOLI nia notísia sira hodi tau iha jornál kuaze loroloron, entre notísia 5 to’o 10”, Prezidente Ajénsia TATOLI, Institutu Públiku (TATOLI,IP), José da Costa agradese iha ámbitu lansamentu Livru “TATOLI nia Ain Le’ut” no Livru Foto “LALATAK”.

Maibé nia husu mídia na’in sira katak atu sita notísia, importante liu maka sita nia fonte katak husi ANTIL/TATOLI, nune’e mós ba diresaun DNDI iha SECOMS ne’ebé konsege inklui TATOLI nia notísia iha boletin SECOMS nian.

“Ba ita-boot sira hotu nia rekoñesimentu, konfiansa no respeitu mútua, ami hato’o obrigadu wa’in”, Prezidente dehan.

Tanba ne’e, ba Estadu nia interese no asegura sidadaun sira-nia direitu ba asesu informasaun loos no kredivel, TATOLI sei firme no prontu nafatin iha ne’ebé de’it no bainhira de’it.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here