Reprezentante SEKOMS Diretor DNDI, Estevao da Costa Belo, hafoin lansamentu entrega bulletin Governu nian ba Xefe Suku Rotutu. Imajen/Felicidade Ximenes.

MANUFAHI, 21 dezembru 2019 (TATOLI)–Oitavu Governu konstitusionál liu husi Sekretária Estadu Komunikasaun Sosiál inaugura sentru informasaun ho tema “Hamutuk Haklaken Informasaun Ba Mudansa Sosiál” iha suku Rotutu, Munisípiu Manufahi

“SEKOMS harii sentru informasaun sira iha Suku rurál nu’udár atividade ida iha prioridade sira ne’ebé define ona iha programa desiminasaun informasaun liuliu iha sub-programa Governu iha povu nia Leet, naroman ba Suku,” dehan reprezentante SEKOMS Diretór Nasionál Diseminasaun Informasaun (DNDI), Estevão da Costa Belo, iha ninia deskursu iha serim ónia inaugurasaun sentru informasaun iha Suku Rotutu, ohin.

Nia hatutan,  atividade prinsipál sira iha sentru informasaun suku rurál sira ne’e maka halibur, prodúz no divulga informasaun ba populasaun sira iha nivel suku.

Sentru informasaun ne’e, nia dehan, promove atividade jornalizmu komunitária nu’udár dalan halibur no kanaliza informasaun iha suku laran no hosi suku laran ba Governu ka Estadu. Aleinde ne’e, tuir nia, atu promove poténsia turizmu, kulturál no poténsia agrikultura nian sira iha suku laran.

Serimónia inaugurasaun ba sentru informasaun iha Suku Rotutu  ne’e, nia esplika, nu’udar kontinuasaun hosi atividade lansamentu programa Governu iha povu nia leet “Naroman Ba Suku” ne’ebé SEKOMS lansa tiha ona iha fulan Jullu liuba.

Antes organiza serimónia ne’e, nia infroma, SEKOMS transfere uluk ona fundus ba suku Rotutu hodi halo instalasaun ekipamentu informátika ba sentru, organiza formasaun kona-ba jestaun no Citizen Journalism  no verba orsamentu ba serimónia inaugurasaun ne’e rasik.

Iha fatin hanesan, Kordenadór Sentru Informasaun Suku Rotutu, Amorin Mendes, hateten iha kontinuasaun lansamentu naroman ba suku ida ne’e husi parte SEKOMS rasik hakarak programa ne’e atu povu hetan informasaun sai hanesan matan no ibun hodi nune’e bele liga parte estadu no povu bele sente.

“Iha loron 26 setembru 2019, ekipa istalasaun ba sentru informasaun Rotutu halo reuniaun ida ho membru suku sira hodi deside ekipa istalasaun ne’e trasforma sai nu’udar membru  sentru informasaun Suku Rotutu,” nia dehan.

Nia hateten, hafoin ida ne’e estrutura ne’ebé formadu ona iha sentru informasaun Suku Rotutu ba loke konta bankaria iha BNCTL iha Postu Adminsitrativu Same iha 18 outubru 2019.

Iha loron 25 outubru  estrutura sentru hamutuk ho lider komunitariu sira ba asina nota trasferénsia fundus públiku iha Sekretariadu Estadu Komunikasaun Sosiál nia fatin no asina nota sira ne’e  no hetan apoiu fundus ne’ebé públika sai iha jornál da repúblika hamutuk $10.000.

“Iha 22 novembru 2019 husi SEKOMS halo transferénsia mai iha Suku Rotutu iha konta bankaria ne’ebé ita loke iha BNCTL sukursál Same ho montante $10.235 no sentru informasaun Suku Rotutu akonpaña husi sefi suku eleitu ba dada sai osan iha BNCTL Sukursál Same ho montante $10.215.

“Fundus  ne’ebé ami utiliza ba gastu sentru informasaun Suku Rotutu hanesan gastu ba despesas no gastu ba ekipamentus  hamutuk $5.40 no gastus ba instalasaun eletrisidade no hola jeradór hodi hamutuk $500.

Osan ne’ebé  halo ba formasaun ne’e, nia infroma, sira gastu $1.400 no osan ba inauguarsaun sentru ida ne’e gastu $1.250.

“Ami sentru informasaun Suku Rotutu hanesan mós Rotutu oan ida, sente privilejiu boot ida ba Rotutu tanba iha Manufahi eziste suku hamutuk 29 maibé so Rotutu de’it mak hetan instalasaun ida ba iha sentru informasaun  ida ne’e,” nia dehan.

Serimónia lasnasamentu ne’e partisipa husi veteran Suku Rotutu, Diretór BNCTL Manufahi, Komandante Polísia  Postu Admistarativu Same, autoridade lokál no komunidade Rotutu tomak.

Jornalista : Felicidade Ximenes

Editór       : Rafi Belo

HAKEREK NO HATÁN

Please enter your comment!
Please enter your name here