Komandante PNTL Viqueque Interinu, Eduardo Campos. Imajen Tatoli/Domingos Piedade Freitas

UATUCARBAU, 23 dezembru 2019 (TATOLI)–Komandante Polísia Munisipál Viqueque Interinu, Superintendente Asistente, Eduardo Campos, ohin, informa, durante ne’e Polísia Nasionál Timor-Leste (PNTL) rejista kazu violénsia doméstika (problema uma-laran entre feto no mane) ho totál kazu hamutuk 173.

“Ha’u hanoin iha tinan 2019, PNTL Munisípiu Viqueque rejista kazu ne’ebé aas liu iha baze dadus kriminál ho totál hamutuk 173”, nia tenik ba Agência TATOLI, bainhira partisipa semináriu kona-ba estabilidade no seguransa, iha salaun Administrasaun Postu Administrativu Uatucarabau, Munisípiu Viqueque, ohin.

Campos esplika, kazu ne’ebé rejistu aas tuir mai mak hanesan kazu ofensa integridade fízika simples, disputa rai no seluseluk tan.

Nia esplika, razaun husi kazu sira ne’e akontese mak fatór ekonomia, konsumu alkólika no amante (selingkuh) mak hamosu krime oioin iha Munisípiu Viqueque laran.

Eduardo haktuir, kazu hirak-ne’e balun oras ne’e rejistadu iha tribunál no balun rezolve ona liuhusi dalan kultura ninian.

Nia apela ba komunidade liuliu ba juventude tenke hadook aan husi krime no kontribui ba dezenvolvimentu nasionál.

Jornalista: Domingos Piedade Freitas

Editór: Xisto Freitas

HAKEREK NO HATÁN

Please enter your comment!
Please enter your name here