Xefe Sentru Saúde Uatucarbau, Germias Mota. Imajen Tatoli/Domingos da Piedade Freitas

UATUCARBAU, 23 dezembru 2019 (TATOLI)–Xefe Sentru Saúde Uatucarbau, Munisípiu Viqueque, Germias Mota hateten, iha tinan 2019, moras ne’ebé númeru aas iha Uatucarbau mak ispa no moras kulit.

“Moras ne’ebé ami rejista númeru aas iha Uatucarbau mak ispa. Ne’e mak hanesan mear sira no inus-been. Ida-ne’e mak maka’as. Tuir fali mak moras kulit,” Germias ba Agência Tatoli iha Uatucarbau, segunda ne’e.

Nia esplika, moras refere akontese maka’as tanba afeta hosi bailoron naruk ne’ebé akontese hela.

Tuir dadus ne’ebé iha, ispa rejistadu kuaze pursentu 80 no moras kulit kuaze pursentu 50, hafoin moras seluk maibé ladún hanesan ho moras rua ne’e.

Maski moras hirak-ne’e númeru aas maibé doutór sira konsege halo tratamentu di’ak ba pasiente hirak ne’ebé sofre moras refere.

Kona-ba aimoruk iha sentru saúde no postu saúde hotu iha Uatucarbau sufisiente.

Sentru Saúde Uatucarbau iha nia Postu Saúde hamutuk lima ne’ebé kompleta ho nia médiku sira hanesan Bahatata iha doutór ida no infermeiru ida. Afaloicai iha doutór ida, infermeiru ida, farmasista no parteira ida. Loiulu iha doutór ida no infermeira ida. Irabere iha doutór ida no infermeiru ida. Uaniuma iha doutór ida no infermeiru ida.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here