UATUCARBAU, 23 dezembru 2019 (TATOLI)–Komandante Polísia Munisipál Viqueque Interinu, Superintendente Asistente, Eduardo Campos, ohin, hateten, iha festa Natál no Tinan Foun Komandu PNTL Viqueque sei aplika alerta 2, atu ema hotu-hotu selebra Natál no Tinan Foun ho di’ak no kontente.
Nia dehan, komandu Munisípiu Viqueque alerta ona ba komandante sira husi Eskuadra Postu Administrativu Uatucarabau, Uatulari, Viqueque Vila, Dilór, Lacluta no Ossu atu kumpre órden hodi koloka membru sira atu asegura festa boot rua ne’e.
“Ha’u hanoin totál membru PNTL Viqueque ne’ebé mak sei halo seguransa hodi garante pás no estabilidade ho totál hamutuk 156”, nia tenik ba Agência TATOLI, bainhira partisipa semináriu kona-ba estabilidade no seguransa, iha salaun Administrasaun Postu Administrativu Uatucarabau, Munisípiu Viqueque, ohin.
Nia hatutan, husi membru polísia hirak-ne’e, fahe ba ekipa rua. Ekipa ida mak halo seguransa iha tempu misa nian no ekipa seluk mak ekipa urjente atu atende bainhira mosu situasaun urjente ruma.
Eduardo apela ba komunidade atu hakmatek iha tempu Natál no Tinan Foun no lanu karik di’akliu deskansa. PNTL Viqueque prontu asegura estabilidade durante oras 24 nia laran.
Jornalista: Domingos Piedade Freitas
Editór: Xisto Freitas
