Ró ne’ebé MAP entrega ba Guarda Florestál. Imajen/Mídia MAP.

DILI, 20 dezembru 2019 (TATOLI) – Ministru Agrikultura no Peska, Joaquim José Gusmão dos Reis Martins, entrega ona ró Fiber Glass ba Guarda Kosteira no Florestál iha Tutuala, Munisípiu Lautem.

Tuir pájina Ministériu Agrikultura no Peska (MAP) ne’ebé TATOLI  asesu ohin katak, antes entrega ró ne’e, hala’o uluk atividade rituál hodi fó matak-malirin ba ró ne’ebé fó husi MAP hodi apoia serbisu ba proteje Parke Nasionál Nino Konis Santana, inklui apoia transporta bee ba balada sira iha Jaco.

Antes ne’e mós Ministru Joaquim afirma iha tempu badak, sei entrega ró ba Guarda Floresta sira atubele tula bee bá Jaco ho diariamente.

Tuir ministru katak iha Jaco, ró peskadór sira-nian maka iha ne’ebá, entaun sei entrega ró ida ba Guarda Florestál hodi bele transporta bee bá Jaco no MAP sei aloka osan uitoan ba situasaun emerjénsia hodi responde ba balada sira-nia sofrimentu ba bee no ai-han nian.

“Ha’u seidauk hatene totál orsamentu, maibé agora ha’u sei bolu parte finansa nian atubele aloka osan ruma hodi ita atende ba situasaun emerjénsia”, ministru afirma foin lalais ne’e.

Iha 19 dezembru ne’e, ho akompañamentu husi Administradór Munisípiu Lautem, Zeferino dos Santos Sequeira, Polísia Nasionál Timor-Leste Munisípiu Lautem no komunidade sira, Ministru Joaquim fó ona ró ki’ik hodi tulun serbisu Guarda Florestál no Kosteira sira.

Ministru husu ba komunidade ne’ebé bá vizita Tutuala no illa Jaco, lori mós bee masa ki’ik ida hodi apoia no fó hemu balada sira iha Jaco.

Notísia relevante : Aban, MAP Intensifika Bee ba Rusa Sira iha Jaco

Edisaun : Maria Auxiliadora

HAKEREK NO HATÁN

Please enter your comment!
Please enter your name here