Graduadu IPDC hasai foto hamutuk ho Ministru Longuinhos dos Santos. Imajen/Nelia Fernandes

DILI, 20 dezembru 2019 (TATOLI)- Ministru Ensinu Superiór Siénsia no Kultura (MESSK), Longuinhos dos Santos hateten, estudante sai hanesan pilár importante no razaun forte hodi harii Universidade. Tanba ne´e, governante ne´e fó hanoin katak ita labele simu de’it estudante sira, maibé ita iha obrigasaun atu asegura kondisaun aprendizajen nian ne’ebé di’ak no ho kualidade tanba estudante sai hanesan pilár importante no razaun forte hodi harii Universidade.

“Se ita la halo hotu buat ne’ebé temi ona, atu garante susesu ba estudante sira, ita-nia misaun rasik mós sei la hetan susesu,” konsidera Ministru Longuinhos dos Santos, iha nia diskursu perante graduadu IPDC (Instituto Profissional de Canossa), iha ámbitu graduasaun IPDC ba dala VII ho tema Papel Ensinu Superiór Timor-Leste iha Era Revolusaun Indústria, iha salaun Canossa, Manleuana, Díli, ohin.

Ministru mós fó lia-menon ba graduadu sira katak loron graduasaun ne´e nu´udar loron graduadu sira nian tanba hafoin tinan haat ne’ebé nakonu ho esforsu aan ba estuda no sakrifísiu, ohin sira simu, iha serimónia ida ne’e, troféu vensedór ni’an.

“Ha’u hakarak felisita imi hotu, graduadu sira no imi-nia família, tanba imi-nia susesu ne’ebé imi hetan, ha’u fiar katak hetan apoiu makaas husi imi-nia família,” katak Ministru Longuinhos dos Santos.

Nia reforsa, graduasaun sai hanesan eventu importante la’ós de’it atu taka siklu formasaun ida ni’an maibé atu loke perespetiva foun, liuliu atu kontinua formasaun iha nível pós-graduasaun ni’an.

Kestaun ida ne’ebé ema barak ko’alia iha ita-nia sosiedade relasiona ho aprendizajen durante ita-nia vida (lifelong learning), ne’ebé sai hanesan knaar ida importante no boot tebes ba moris ema nian iha mundu tomak no hanesan instrumentu ba partisipasaun husi sidadaun sira ba promosaun dezenvolvimentu sustentável.

Ita-nia sosiedade atuál hasoru iha sira-nia moris lorloron ho inovasaun no mudansa iha merkadu traballu. Mudansa no inovasaun hirak ne’e halo katak, diplóma ne’ebé estudante sira hetan la sufisiente atu garante sira hetan asesu automatikamente hodi tama iha merkadu traballu.

“Ho razaun ida ne’e ha’u hakarak motiva estudante sira ne’ebé halo graduasaun ohin, atu buka aumenta imi-nia kompeténsia sira (skills) iha imi-nia vida tomak”.

“Estudante sira ne’ebé tama kedas ba merkadu traballu, hafoin sira remata sira-nia estudu, presiza iha konsiénsia katak profisionalizasaun ezije kompeténsia adaptasaun, kapasidade esforsu no disponibilidade atu aprende husi imi tanba sidadaun sira tenke disponível atu aprende hela de’it iha sira-nia moris tomak,” enkoraja governante ne´e.

Ministru Longuinhos dos Santos katak tak, Xave susesu ni’an maka aprende atu aprende no nunka bele hanoin katak iha tempu maka kontinua aprende. “Hanesan aprende iha universidade, aprende iha servisu fatin no aprende iha fatin seluk mós”.

“Kualidade formasaun liu-husi pratika iha universidade sira ni’an valida, liu husi kapasidade-nia alunu graduadu sira hodi aprende no bele tama iha merkadu traballu.

“Graduadu sira sai izemplu no referénsia kualidade formasaun ni’an iha instituisaun ne’ebé sira estuda ba Kualidade formasaun maka kondisaun esensial ba susesu”.

“Se kualidade di’ak, ne’e hatudu katak ita loke hela futuru ida naroman ba ita ni’an jovem sira no ba ita ni’an nasaun”.

“La iha tan estratéjia seluk ba futuru nasaun ida ne’e ni’an, se laos, buat hirak ne’ebé ita halo no husik atu halo, iha universidade sira,” dehan nia.

Ministru Longuinhos dos Santos mós akresenta katak edukasaun ho kualidade mak xave atu ita bele forma rekursu umanu ne’ebé bele muda Timor-Leste atu sai nu’udar nasaun dezenvolvida ida ho progresu sosiál no ekonómiku aas, no preparadu atu hasoru dezafiu husi sosiedade atuál.

Tanba ne’e, maka ita tenke aposta maka’as iha kualidade, reforsa formasaun dosente sira nian, kondisaun aprendizajen, pertinénsia kurríkulu no dimensaun sira seluk. Governu, reprezenta husi Ministériu Ensinu Superior, Siénsia no Kultura, asume responsabilidade bo’ot atu apoia Insituisaun Ensinu Superiór sira hodi atinje nível kualidade ne’ebé aas ba beibeik, tanba ita hotu fiar katak kualidade formasaun maka futuru nasaun ni’an.

“Ha’u dezeja susesu iha nível pessoál no profisionál no hein katak imi bele fó kontribuisaun ba dezenvolvimentu ita-nia rai doben Timor-Leste. Susesu husi estudante sira bele alkansa de’it ho apoiu husi família.

Iha biban hanesan, Ministru Longuinhos dos Santos mós kongratula IPDC tanba konsidera katak serimónia graduasaun ne’e sai hanesan rezultadu husi servisu ne’ebé dirijente no dosente sira husi instituisaun hala’o.

“Serimónia ida ne’e hatudu ona susesu iha misaun, ne’ebé maka Instituisaun Ensinu Superior sira tenke hala’o, liu-liu kontribuisaun ba formasaun rekursus-humanus iha ita-nia rai”.

Nia katak, Prioridade prinsipál husi VIII Governu Konstitusionál nian iha área Ensinu Superiór mak atu asegura kualidade husi prosesu hanorin no aprendizájen iha Instituisaun Ensinu Superiór públiku no privadu sira, “Objetivu atu Timor-Leste bele fó graduasaun ba joven sira ho kualifikasaun ne’ebé adekuada”.

“Ida ne’ebé mak sei sai hanesan dezafiu ne’ebé ita-nia rai hasoru hela, atu bele hetan kualidade, ita presiza estabelese regra hirak ne’ebé forte kona-ba asesu no ingresu ba ensinu superior, atu asegura katak estudante sira ne’ebé ramata ensinu sekundáriu iha kompeténsia atu tama ba Ensinu Superiór”.

“Nesesita mós define númeru vaga anuál sira ne’ebé adekuadu ho númeru profesór. Disponibilidade sala aula, karteira, laboratóriu, billioteka no fasilidade sira seluk,” governante ne´e fó hanoin.

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here