Bandeira Austrália

DILI, 20 Dezembru 2019 (TATOLI)-Konsul Jerál Timor-Leste ba Austrália, Luciano Valentim da Conceição informa katak Governu Federál Austrália, tuir planu iha 2020, sei fó bolsa estudu nível sekundária ba nasaun pásifika tomak ho totál estudante hamutuk na´in 200.

“Ida ne’e programa foun, nune’e dirijente politíka sira konvida ha´u ba partisipa enkontru ne’e, ha´u husu autoridade kompotente Austrália atu enkaixa mós timoroan iha programa ne’e nia laran,” informa Luciano Valentim da Conceição ba jornalista sira, liuhusi konferénsia imprensa iha Gloria Jean’s Coffe, Colmera, ohin.

Nu´udar Konsul Jerál TL iha Austrália, diplomata timoroan ne’e akresenta, nia área responsabilidade politíka iha de’it Estadu Norte Sul nune’e atu alkansa liután planu ne’e nia hein nomeiasaun embaixadór foun atu halo koordenasaun di’ak  hodi bele realiza programa ne’e.

“Ha´u hein fulan oin ita-nia embaixadór foun kuandu nomeia mai posting iha Canbera, ami sei koordena hamutuk oinsá programa manda estudante nivél sekundária  ba estuda iha Austrália bele realiza no bele enkaixa Timor-Leste iha laran”.

“Bolsa estudu nivél sekundáriu oferese ba estudante iha nasaun pasifíku sira. Hosi Governu Australia ne’e, sei konsentra hotu iha estadu rua maka hanaran Estadu Quensland no Estadu Nova Galec Sul,” nia informa.

Iha biban hanesan, Konsul Jerál Timor-Leste ba Austrália, Luciano Valentim informa mós katak durante tinan hirak nia laran, diplomata timoroan sira iha embaixada TL iha Australia eforsu maka´as konsege hatama TL ba Programa ho naran “Pacifik Skin”

Pacific Skin ne’e Australianu sira-nia kompañia privada sira, ho laran di’ak oinsá bele ajuda ema sira hosi país pasífíku bele ba serbisu iha sira-nia kompañia, nune’e Timor-Leste kada tinan atrávez SEPFOPE (Sekretáriu Estadu Formasaun Profisionál no Empregu) envia ema lubun ba serbisu iha ne’ebá,” nia haktuir.

Relasiona ho esforsu serbisu sira ne’e hotu, Konsul Jerál TL ba Austrália ne’e hateten, sira iha hanoin atu luta oinsá bele hasa’e nivél serbisu ba traballadór timoroan sira ne’ebé serbisu iha kompañia sira ne’e.

“Uainhira ha´u to’o iha ne’ebá, ha´u hasoru malu ho lidér sira, ami iha hanoin atu luta para oinsá atu hasa’e nivél ida ne’e. Baibain sira haruka ita-nia ema halo serbisu iha to’os, iha to´os no fábrika balu liga direta ho serbisu todan hanesan”buru kasar” iha planu para oinsa nivél ne’e hasa’e uitoan,” nia tenik.

Aleinde halo aproximasaun hodi enkaixa TL iha programa bolsa estudu, Konsul Jerál timoroan ne’e mós informa katak halo mós aproximasaun ba iha programa seluk hanesan Saúde oinsá atu enkaixa mós timoroan sira ne’ebé lisensiadu no kualifikadu ona iha área ne’e ba serbisu iha Austrália.

“Australia mós kada tinan simu traballador profisaun nu´udar infremeira tanba iha Austrália fatin hanaran” Panti Jompo” Austrália nia ema rasik atu halo serbisu asisténsia la to’o nune’e ami ko´alia ho Austrália atu nune’e sira bele konsidera ita-nia enfermeira Timor-Leste sira ne’ebé kualifikadu no serbisu la to’o bele ba serbisu mós iha ne’ebá,” nia haktuir tan.

Nia hatutan,  iha mós kompañina bo’ot tolu ne’ebé atu mai halo serbisu voluntáriu iha Timor-Leste ne’ebé halai liu ba serbisu saúde nian maibé ida ne’e depende mós ba ministériu relevante TL.

“Primeira-vez asosiasaun bo’ot hanaran Australia Business Council Summit, sira konvida ha´u partisipa eventu ida hodi aprezenta imajen Timor-Leste nian oinsá sira bele mai investe iha ne’e”.

“Hafoin ne’e ha´u mós enkontru ho grupu investimentu boot tolu hanaran China-Australia Trade Economy Council Ascociation no sira planu atu mai vizita Timor-Leste iha fulan Fevereiru ho planu atu lori medíku profisionál matan nian atu mai serbisu voluntáriu iha Timor-Leste maibé depende fali ba Ministériu Saúde,” Konsul Jerál Timor-Leste ba Austrália, Luciano Valentim da Conceição konklui.

Jornalista        : Nelia Borges

Editór              : Rafy Belo

27 KOMENTÁRIU

HAKEREK NO HATÁN

Please enter your comment!
Please enter your name here