Logo UNITAL.

DILI, 20 dezembru 2019 (TATOLI) –Universidade Oriental Timor Lorosa´e (UNITAL) iha ona planu prioridade ba tinan oin, hahú husi janeíru 2020, sei loke konkursu ba projetu harii klínika saúde ba Fakuldade Saúde (FS).

Planu harii klínika saúde universidade nian ne’e alende atu ajuda tratamentu saúde ba estudante sira, sei loke mós tratamentu saúde ba públiku espesiál liu ba komunidade iha área Becora nian.

Magnífíku Reitór UNITAL, Florindo Pereira iha ninia intervensaun akadémika iha serimónia graduasaun ne’e informa katak, janeiru inísiu, ninia parte sei prevee ona orsamentu ba konstrusaun klínika Saúde UNITAL nian, hodi nune’e bele atinji planu ne’ebé mak trasa ona.

“Klínika saúde UNITAL nian ne’e sei ajuda estudante Fakuldade Saúde sira atu bele kontinua sira nia praktek atu  manan esperiénsia hodi bele kompete iha merkadu traballu,” garante Reitór Florindo Pereira perante graduadu na´in 567 iha salaun UNITAL, Becora, ohin.

Nia dehan, iha planu prioridade seluk ne’ebé UNITAL sei alkansa mós mak kria kondisaun di´ak ba kada departamentu sira ho kompleta ho fasilidade laboratóriu. Mehi ida ne’e sei realiza iha 2020 mós. Tuir nia katak fasilidade laboratóriu ne’e atu ajuda estudante sira iha kada departamentu hodi bele hala’o sira-nia prátika.

Iha biban hanesan, Reitór Florindo husu deskulpa ba graduadu na’in 567 tanba planu sira ne’e UNITAL foin bele realiza iha 2020. Maske sira labele aproveita fasilidade sira ne’e maibé fasilidade sei sai nafatin asset (inventáriu) ba universidade no bele nafatin asesu tuir link ne’ebé iha.

Notísia relevante:Estudante Finalista UNITAL Na’in 567 Kompleta Grau Akadémiku

Jornalista        : Tomé Amado

Editór              : Rafy Belo

HAKEREK NO HATÁN

Please enter your comment!
Please enter your name here