Komisáriu Polísia Faustino da Costa no Adjuntu BNN-RI, Inspetór Jenerál Polisia, Puji Sarwono kaer liman, hafoin diskute kooperasaun servisu. Imajen/PNTL

DILI, 19 dezembru 2019 (TATOLI)- Komandu Polísia Nasionál Timor-Leste (PNTL), ohin, iha Kuartél Jerál PNTL, Caicoli, Dili,  realiza enkontru koordenasaun ho Autoridade Badan Narkótika Nasionál Repúblika Indonézia (BNN-RI) hodi estabelese kooperasaun servisu entre parte rua atu estabelese formasaun ba PNTL kona-ba oinsá halo identifikasaun ba tipu droga sira.

Notísia Relevante : PNTL Ho BNN Indonézia Sei Halo Teste Ba Sasan Kontentór Ualu

“Ami diskute kontinuasaun kooperasaun ho PORLI no BNN-RI hodi haree servisu rai rua nian hodi hadi’a no hametin liután.”

“Ba oin sei iha akordu kooperasaun  (MoU-sigla inglés) ne’ebé ita sei asina hodi haree área saida de’it maka ita bele servisu hamutuk iha formasaun konjunta,”  hateten Komandante Jerál PNTL, Komisáriu Faustino da Costa.

Nia hateten, PNTL presiza hetan formasaun husi BNN-RI para bele aumenta rekursu investigadór membru polisia sira hodi halo kontrolu ba kualkér kazu krime droga no tipu droga sira.

Atu kombate krime droga iha Timor-Leste, PNTL sei halo koordenasaun ho liña instituisaun Estadu, hanesan Prokuradór Jerál Republikanu (PJR), Autoridade Aduaneira (AA), Diresaun Nasionál Servisu Migrasaun, Ministériu Saúde, Ministériu Agrikultura no Peska (MAP) liuhusi Diresaun Nasionál Kuarentena no Bio-Seguransa  hodi halo kontrolu másimu iha fronteira, portu no aeroportu.

Iha fatin hanesan, Adjuntu BNN-RI, Inspetór Jenerál Polisia, Puji Sarwono, konsidera diskusaun ne’e nu’udar rezultadu husi enkontru ne’ebé parte rua hala’o tiha ona iha  loron 29 outubru 2019, iha Atambua-Indonézia.

BNN-RI prontu apoiu nafatin PNTL iha área kapasitasaun Information Technology (IT) nian hodi fasilita membru ne’ebé servisu iha área droga.

“Ami mai Timor-Leste hodi afirma di’ak  liután kooperasaun ne’ebé durante ne’e estabelese ona. Ami haree katak, ba futuru  sei hasoru dezafiu barak,” hateten Puji Sarwono.

Ba oin, Puji Sarwono hateten, kooperasaun ne’e la’ós entre polisia no BNN de’it, maibé Governu rai rua liuhusi Ministériu Negósiu Estranjeiru Timor-Leste no Indonézia bele estabelese mós kooperasaun sira liga ba akordu estradisaun.

Antes ne’e, BNN rasik konvida ona membru PNTL na’in rua hodi partisipa formasaun iha área Narkotika Interdicsion iha Lido-Bogor Indonézia.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here