Sesaun plenária Parlamentu Nasionál. Imajen/Tatoli

DILI, 18 dezembru 2019 (TATOLI) – Parlamentu Nasionál (PN) liuhosi sesaun plenária estráordinária kuarta ne’e, halo diskusaun no votasaun ba Projetu Rezolusaun n.º 49/V (2ª), Orsamentu Retifikativu Parlamentu Nasionál 2020.

Iha sesaun ne’e, Komisaun C ne’ebé trata asuntu Finansa Públika, aprezenta relatóriu pareser ho objetivu atu revee no reduz dotasaun globál orsamentu PN ne’ebé aprova ho Rezolusaun Parlamentu Nasionál nº 36/2019, 19 setembru, ho previzaun anuál ba despeza no reseita ho totál $16.486.896.

Hafoin Sekretária-Jerál PN, Cedelizia Faria dos Santos ho ninia komitiva sira halo audiénsia ho Komisaun C, konsege halo redusaun no ajusta dotasaun orsamentu ba despeza no reseita PN ba tinan fiskál 2020 ho totál $15.671.125.

Maski nune’e, liuhosi votasaun iha plenária, Projetu Rezolusaun n.º 49/V (2ª) la pasa ho votu a-favór 18, kontra 30 no abstensaun 10, tanba maioria deputadu la konkorda ho redusaun orsamentu ho razaun labele sakrifika funsionamentu Parlamentu hodi ezerse funsaun lejizlativa, akompañamentu fiskalizasaun no kontrola atividade ezekutivu.

Nune’e, vigora nafatin Rezolusaun nº 36/2019, 19 setembru, ho previzaun anuál ba despeza no reseita ho totál $16.486.896.

Prezidente Parlamentu Nasionál (PPN), Arão Noé de Jesus da Costa Amaral, hateten maski Konsellu Administrasaun halo ona jestaun no redusaun, maibé hafoin debate naruk ba redusaun orsamentu, deputadu sira sente afeta tebes ba servisu komisaun nian no mós atividade PN inklui sekretariadu nian iha tinan 2020.

“Tan ne’e mak la konkorda halo redusaun no justifikasaun bele iha razaun tanba planu orsamentu Parlamentu nian iha inisiál hamutuk millaun $22, bainhira ami ko’a, redúz to’o millaun $17,900. Maibé hafoin debate iha plenária, deputadu sira redúz ba millaun $16-resin”, dehan PPN.

Antes retifika orsamentu, ba tinan 2020 Parlamentu simu tetu fiskál hosi Governu ho montante millaun $14, maibé PN prepara ninia orsamentu privativu rasik ne’ebé nia montante sa’e ba millaun $17.909.531.

Hosi orsamentu millaun $17.909.531 ne’e kompostu hosi saláriu no vensimentu millaun $5.945.228, Bens no Sevisus millaun $9.693.912, kapitál menór millaun $1.016.391, kapitál no dezenvolvimentu rihun $80.000 no transferénsia millaun $1.174.000.

Deputadu Bankada KHUNTO, António Verdial de Sousa, hateten maski nia rasik laiha informasaun ba servisu redasaun orsamentu privativu PN tinan 2020, ne’ebé lidera husi Konsellu Administrasaun maibé nia konkorda labele iha redusaun tanba PN iha nesesidade barak.

“Diak liu ita mantein pozisaun ne’e tanba ohin deputadu sira dehan Konsellu Administrasaun halo tuir sira-nia gostu deit”, tenik Verdial.

Nia hatutan, Parlamentu iha komisaun A to’o G ne’ebe maka hala’o servisu iha terrenu la’ós Konsellu Administrasaun, tanba ne’e tenki mantein ho rezolusaun inísiu hodi hetan aprovasaun.

Deputadu ne’e hato’o lamentasaun tanba Konsellu Administrasaun halo ajustamentu atu redúz montante $815,33 hosi millaun $16.486.896, hela de’it millaun $15.671.125.

Prezidente Bankada Partidu Demokrátiku (PD), Antonio da Conseição ‘Kalohan’, konsidera orsamentu privativu sofre ona redusaun barak.

Nia observa, Komisaun C hamutuk ho Sekretariadu Jerál Parlamentár bainhira halo audiénsia, sempre konsidera nafatin kna’ar PN.

“Ita tenke halo ho elevadu, la’ós halo asal-asal de’it maibé buat ne’e presiza konsidera mós Konsellu Administrasaun sira-nia servisu”, dehan Kalohan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here