Handtractor. Imajen Google

DILI, 18 dezembru 2019 (TATOLI) – Ministériu Edukasaun, Juventude no Desportu (MEJD) oferese “Handtractor” ba eskola Ensinu Sekundária Téknika Vokasionál (ESTV) 10 iha territóriu Timor-Leste (TL), iha área agrikola nian.

Ministra Edukasaun, Juventude no Desportu, Dulce de Jesus Soares hateten, kada tinan ministériu sempre prevee orsamentu menus husi millaun ida hodi apoiu eskola hotu iha territóriu Timor Leste.

Orsamentu kada tinan ne’ebé MEJD aloka ne’e ba eskola hotu atu kontinua kompleta ekipamentu ka materiál didátiku sira ne’ebé Eskola ESTV sira presija tuir sira-nia área.

“Agora ita sosa handtractor ne’e hodi fó ajuda ba eskola ESTV sira atu kontinua sira-nia atividade iha área agrikola nian,” dehan Ministra Dulce de Jesus  ba jornalista sira iha MEJD Vila Verde, kuarta (18/12/2019).

Governante ne´e akresenta, orsamentu menus husi millaun ida ne’e MEJD preve ba eskola hotu tanba maske ki’ik maibé oinsá atu jere hodi nune’e bele kompleta neineik ekipamentu no fasilidade iha kada eskola sira. “Maibé, presija hare eskola ida ne’ebé mak nesesidade liu atu hetan ekipamentu sira ne’e”.

Eskola ESTV 10 ne’ebé hetan apoiu handtractor husi MEJD ne’e mak hanesan ESTV Bermoli Maulau Ainaro, ESTV Ainaro Vila, ESTV Hatu-Udo Ainaro, ESTV Lacolori Cailaco, ESTV Bobonaro Vila, ESTV Raicala Ermera, ESTV Kayrala Manatuto, ESTV Fohorem Covalima, ESTV Halibur Manufahi, no ESTV Leorema Liquiça.

Entertantu, serimónia entrega ekipamentu sira ne’e simbolíksmente realiza ona no semana ida ne’e mak foin distribui ba eskola 10 ne’ebe tama ona iha lista.

Jornalista        : Tomé Amado

Editór              : Rafy Belo

HAKEREK NO HATÁN

Please enter your comment!
Please enter your name here