Logotipu ISC

DILI, 17 dezembru 2019 (TATOLI) – Estudante Finalista husi Institutu Superior Cristal (ISC) na’in 408 sei simu grau akadémiku, iha 23 dezembru tinan ne’e. Estudante finalista na’in 408 ne’e kompostu husi Fakuldade Siénsia Edukasaun (FSE) no Fakuldade Siénsia Saúde (FSS).

Totál finalista husi FSE hamutuk 259 no FSS hamutuk 149. Husi fakuldade rua ne´e, mane 175 no feto 233.

FSE iha departamentu 10 mak hanesan Matemátika, Fízika, Kímika, Ekonomia, Kontabilidade, Inglés, Portugés, informátika, Pisikolojia no Sosiolojia. FSS iha departementu rua de’it mak hanesan Enfermajen no Parteira. “Ita iha departamentu 12 mak sei gradua,” informa Reitór Sebastião Pereira ba Ajénsia TATOLI iha kampus ISC Balide, ohin.

Nia dehan total númeru finalista ne’ebé públika daudaun ne’e fiksu ona. Sira ne’e mak sei hakat ba serimonia graduasaun ne’ebé sei realiza iha 23 dezembru 2019 iha CCD (Sentru Konvensaun Dili, sigla portugés)

Estudante sira ne’e normalmente kumpre ona kritériu no prosedimentu ISC nian inklui administrasaun akadémika no administrasaun finanseira.

Kona-ba preparasaun akadémika nian, Reitór Sebastião Pereira dehan ISC forma ona komisaun organizadora inklui sesaun lubuk ida mak fó apoiu ba servisu atu realiza serimónia graduasaun ne’e. Hanesan seksaun públisidade ne’e oinsa halo kontaktu ho media sira atu halo kobertura ba eventu ne’e inklui sesaun serimónia ne’ebé atu atende ba semináriu no atividade graduasaun nian.

“Seksaun lubuk ida mak forma ona atu nune’e bele toma responsabilidade ba servisu sira ne’e hodi nune’e to’o data fiksa realizasaun atividade ne’e buat hotu bele la´o ho di´ak,” garante autoridade másima estabelesimentu ensinu superiór privadu ne´e.

Jornalista        : Tomé Amado

Editór              : Rafy Belo

HAKEREK NO HATÁN

Please enter your comment!
Please enter your name here