Liga Juveníl Timor-Leste. Imajen/Espesiál

DILI, 16 dezembru 2019 (TATOLI) – Diretór Verifikasaun no Lisensa Liga Futeból Amadora (LFA), José Carvalho, hateten durante ne’e liga juveníl hala’o ona jogu maibé la autoriza jogadór ho idade boot, nune’e bele fó oportunidade liu ba idade 15 ba kraik.

“Ami hasai ona karta hodi dirije ba klube sira ne’ebé partisipa iha Liga Juveníl ne’e, atu tuur hamutuk hodi ko’alia no fó hanoin ba malu oinsá atu rezolve difikuldade sira hanesan agora ita haree jogadór balun dehan idade ki’ik maibé realidade hatudu balun boot. Ida ne’e ami nota iha klube tolu ka haat hansa ne’e mak sira mai ho jogadór ne’ebé ho idade boot”, dehan José ba Agência Tatoli iha edifísiu LFA, Bairro Formosa, segunda ne’e.

Nia dehan, klube hirak ne’ebé iha jogadór idade boot mak hanesan Aitana, SLB, Academica.

“Ho nune’e mak ami hala’o reuniaun ida ho sira hodi haree. Ita labele hanesan ne’e bebeik, tanba ita atu hadi’a futeból ne’e ba oin no tenke prodús jogadór foun. Ita labele uza jogadór ne’ebé joga ho idade boot, tanba idade ki’ik mós nia joga, agora oinsá mak ita bele hetan jogadór foun,” nia dehan.

José subliña, antes ne’e kritéria fó sai ona ba klube sira maibé sira la kumpre no loron besik sira foin submete lista jogadór, tanba ne’e parte komisaun labele hola desizaun hodi hapara tanba bele prejudika jogu la’o tarde.

“Ita fó sai ona kritéria. Kritéria ne’e mai hosi Asian Football Confederation (AFC), maibé ita nia klube sira ne’e lori lista jogadór sira nian ne’e mai los iha loron ne’ebé atu hahú ona kompetisaun entaun ita haree atu kansela mós labele tanba bele fó impaktu ba jogu. Ita husik sira hala’o tia jornada primeiru depois jornada segundu, nune’e ba oin ami haree jogadór idade boot ami sei hapara”, Diretór ne’e akresenta.

Entretantu, Liga Juveníl hamutuk iha klube na’in-ualu hanesan, Academica, Ponta Leste, SLB, Karketu, Aitana, Assalam, Fitun Estudante no Lalenok husi segunda divizaun.

Tuir oráriu, jogu sei hala’o komesa husi tersa to’o sábadu no orsamentu ba jogu refere hetan apoiu hosi (AFC).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here