Segundu Komandante Polísia Munisípiu Dili, Superintendente Euclides Belo. Imajen/TATOLI

DILI, 15 dezembru 2019 (TATOLI) – Falta loron hirak atu tama Natal no Tinan Foun, Segundu Komadante Polísia Nasionál Timor-Leste (PNTL) Munisípiu Dili, Superintendente Asistente Polísia, Euclides Belo husu ba komunidade ne’ebé hakarak halo prezépiu, tenke tuir regra.

“Ha’u husi parte Polísia ninian, husu ba komunidade no mós ba maluk sira ne’ebé ohin mai tuir misa iha akademia ida-ne’e, atu preparasaun ba Natal no Tinan Foun nian, bele avontade halo prezépiu maibé tenke tuir regra katak bainhira halo prezépiu, tenke dook husi estrada ibun ho distánsia másimu metru 7 no mínimu metru 5, nune’e labele difikulta movimentu ema-nian no transporte públiku”, dehan Euclides ba Agência Tatoli, hafoin partisipa misa domingu adventu datoluk nian iha Kapela Santo António, Akademia Polísia nian, ohin.

Nune’e, nia husu ba komunidade atu pasa informasaun ba malu kona-ba halo prezépiu, tanba husi parte Polísia fó avizu ona, nune’e labele hamosu problema.

Euclides mós apela ba joven sira, atu labele hemu tua iha prezépiu laran iha selebrasaun loron Natal no Tinan Foun.

“Ha’u husu ba joven sira, tenke halo prezépiu ba loron boot Natal no Tinan Foun nian, ho sentidu ida katak prepara-an didi’ak hodi simu kosok-oan Jesus nia moris, la’ós prepara tiha prezépiu maka lori fali ai no fatuk halo nakonu iha prezépiu laran. Aat liu mak hemu fali tua mutin iha fali prezépiu laran”, nia rekomenda.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here