Fahi mate ne’ebé so’e iha mota-laran parte Trisula, Lospalos. Imajen/Tatoli.

LAUTEM, 13 dezembru 2019 (TATOLI) – Hahú iha 15 setembru to’o novembru Ministériu Agrikultura no Peska (MAP), Munisípiu Lautem, rejista fahi hamutuk 1.664 maka mate.

“Fahi ne’ebé mate hamutuk 1.664 iha Lautem, fulan setembru to’o outubru hamutuk 439 no novembru 1225, ida ne’e fó impaktu duni ba ekonomia povu nian”, Diretór Servisu Munisípal Agrikultura (SMA) Munisípiu Lautem, Edmundo da Costa ba Ajénsia TATOLI iha Lospalos, kinta ne’e.

MAP observa katak fahi sira ne’ebé mate maioria husik livre no iha luhan-laran mate ladún barak.

“Ami identifika luhan-laran mate ida ka rua, maibé husik livre maka mate, tanba luhan nia kondisaun no bioseguransa”, katak.

Parte seluk, fahi na’in iha Suku Bauro, Postu Administrativu Lospalos, Olinda Moniz, sente triste tanba iha Lospalos fahi barak maka mate, liuliu nia iha fahi boot hitu maka mate, bainhira atu fa’an karik fahi ida nia presu bele to’o $500 ou $600.

“Ha’u sente triste fahi sira mate, derrepente de’it mate no ha’u nia fahi sira ne’e iha luhan-laran, mesak boot de’it”, dehan nia ho triste.

Nune’e, nia husu ba Governu atubele halo asisténsia téknika ba fahi balun ne’ebé sei moris hodi labele mate tan no husu atu apoia fahi balu atubele haki’ak filafali.

Fahi hirak ne’e mate tanba kauza hosi Peste Suína Afrikana (ASF, silga ingléz) ne’ebé konsege hamate fahi iha territóriu Timor-Leste.

Virus ASF Hahú Menus Hafoin Hamate Fahi Rihun 16

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here