Bibi Rusa hadau malu bee iha illa Jaco,Imajen/Jogerjo Guterres

LAUTEM, 12 Dezembru 2019 (TATOLI) – Ministériu Agrikultura no Peska (MAP), Munisípiu Lautem laiha orsamentu atu sosa bee ba rusa sira iha illa Jaco, Suku Tutuala, Postu Administrativu Tutuala.

Diretór Servisu Munisípál Agrikultura (SMA) Munisípiu Lautem, Edmundo da Costa/Imajen TATOLI

“Ami iha planu duni no hakarak duni atu fó bee ba ita-nia rusa sira iha illa Jaco, más ita osan laiha atu sosa bee, selu ró tula bee no selu ema hiit bee bá Jako hodi rusa sira hemu”, Diretór Servisu Munisípal Agrikultura (SMA) Munisípiu Lautem, Edmundo da Costa, ba Ajénsia TATOLI iha kna’ar fatin, kinta ne’e.

Diretór Musípiu Lautem ne’e friza maski Diresaun Nasionál Floresta halo ona tanke bee ho orsamentu rihun $4, maibé bee laiha atu enxe hodi rusa sira hemu.

“Ita presiza rekursu umanu no osan tanba lori bee no ró la’ós gratuitu”, katak.

Edmundo da Costa dehan MAP Munisípiu Lautem ezekuta de’it planu ne’ebé mai husi Diresaun Nasionál floresta, tanba balada sira iha parke nasionál Nino Konis Santana ne’e responsabilidade sira-nian.

“Ami ezekuta de’it tanba ami-nia planu halo ona más laiha osan ita labele ezekuta liuliu fó bee ba rusa sira atubele moris”, preokupa.

Nia rekoñese rusa mate duni iha illa Jaco tanba bailoro naruk afeta bee laiha no duut maran hotu. Tanba ne’e, “Ita halo proposta no planu atu asegura rusa sira maibé husi Ministeriu Agrikultura no Peska (MAP) seidauk tau prioridedade”, adianta.

Planu ne’ebé iha, hahú husi 2008 to’o 2019 husu atu ministériu aloka osan hodi halo tanke no barajen hodi rai udan-been atu bailoro naruk rusa sira bele hemu, más to’o agora planu la hetan aprovasaun.

Atu rezolve kestaun ne’e maka MAP munisipál halo ona koordenasaun ho autoridade lokál sira atubele serbisu ho peskadór sira hodi oferese voluntáriu bee ba rusa sira.

“Ita-nia meiu ikus maka serbisu hamutuk ho peskadór atubele voluntáriu lori bee bá rusa sira tanba ita osan laiha atu selu ema”, dehan nia.

Nia dehan: “Ha’u fiar ita serbisu hamutuk, ita bele asegura ita-nia rusa sira iha illa Jaco tanba pertense iha parke nasionál Nino Konis Santana”.

Antes ne’e, Responsavel Parke Nasionál Nino Konis Santana nu’udar mós pesoál kontratada hosi MAP, Lino de Araújo, konsidera Governu fó naran parke nasionál Nino Konis Santana, maibé la kuidadu no iha bailoro naruk rezulta rusa barak mate illa Jaco tanba bee laiha.

“Ita dehan parke nasionál ne’e naran eroi Nino Konis Santana, ita haree laiha implementasaun tanba la proteje no asegura balada sira iha laran, liuliu rusa sira iha illa Jaco atu sai riku-soin Timor-Leste”, lamenta.

Lino Araújo rekomenda ba Governu liuhusi MAP atu konstrui tanke boot ida iha Jaco atubele rai udan-been, hodi bailoro naruk rusa sira bele hemu.

“Fó bee ba rusa ne’e hahú husi 2004 to’o agora, ami fó hatene Governu más dehan orsamentu la sufisiente atu fornese bee ba rusa kuaze rihun ida iha illa Jaco”, salienta.

“Orsamentu husi Governu la sufisiente tanba osan oituan de’it atu fornese bee kada semana ida tenke litru 1100 atu rusa sira hemu”, haktuir.

Atu evita rusa mate, nia sujere katak MAP tenke fornese bee, hahú husi agostu to’o udan monu rai atu rusa bele hemu, maibé realidade MAP lori bee litru 2000 mai iha setembru de’it.

“Bee ne’e MAP sira lori mai iha setembru ho litru 2000, más hotu kedan no foin 4 novembru lori osan $1.100 atu haruka ami sosa bee, maibé ne’e mós la sufisiente”, dehan.

Nia salienta katak rusa ne’ebé mate iha Jaco, labele sura hotu tanba Jaco luan no kuaze 30- resin maka nani sai husi Jaco ba Ualu-Sere.

“Ami sente triste bainhira haree rusa mate, tanba ita haree ho matan, más mate iha foho leten ita la hatene rusa hira”, dehan nia ho triste.

Nia hateten, daudaun ne’e MAP konstrui ona bee tanke ho orsamentu rihun $4-resin, maibé laiha bee atu enxe hodi rusa sira bele hemu.

Peskadór Ualu-Sere, suku Tutuala, João Canto, sente triste bainhira haree rusa krekas no barak maka mate ona tanba bee laiha no MAP ladún tau importánsia hodi salva balada sira-nia vida.

Tuir observasaun hosi peskadór katak rusa kuaze 200-resin maka mate iha Jaco tanba ruin naklekar hela iha fatin-fatin, tanba área Jaco ne’e luan.

“Bainhira rusa ne’ebé loroloron mai, ami fó bee uitoan ida ne’e maka mate iha ami-nia oin no ami haree, más illa Jaco ne’e luan ne’ebé kuaze 200-resin maka mate ona tanba bee laiha”, katak.

Peskadór ne’e konta rusa hirak ne’e fuik, maibé bainhira sira horon peskadór sira lori bee bá, sira mai besik hanesan balada ne’ebé maus.

“Ami halo kontribuisaun rasik hodi lori bee mai fó rusa, sira mai hein ami iha tasi ibun hanesan karau ka bibi ne’ebé loroloron ita hamaus no kuandu ami tau bee sira hadau malu de’it”, tenik.

Tanba ne’e, peskadór husu ba ministériu kompetente katak labele rusa atu mate maka foin lori bee mai, maibé antesipa kedan iha agostu to’o udan monu-rai.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here