Country Representative Banku Mundial iha TL, Macmillan Anyanwu. Imajen TATOLI/Antónia Gusmão.

DILI, 12 dezembru 2019 (TATOLI) – Banku Mundiál lansa relatóriu foun sobre ekonomia Timor-Leste nian ne’ebé hatudu katak kreximentu ekonómiku sei aselera ba porsentu 4.9 iha 2021 no espera iha tinan ne’e rekupera ba porsentu 4.1.

Iha relatóriu ne’ebé publika, ohin, despeza públika iha semestre dahuluk tinan ne’e mak porsentu 16 aas liu husi períodu hanesan iha 2018. Ida ne’e kontribui ba aumenta konfiansa husi konsumidór, enkuantu investimentu privadu mós tenke benefisia estabilidade polítika no ekonomia.

Tuir relatóriu ne’ebé lansa dala rua iha tinan ida, Banku Mundiál analiza ekonomia nasaun no aprezenta evidénsia katak atividade ekonómika rekupera husi kontrasaun 2017-2018, dadus sujere ba parte rua despeza públika no konsume públika aumenta. Entretantu, perspetiva kreximentu ekonómiku iha médiu prazu nafatin prejudika husi setór privadu ne’ebé fraku.

Ekonomista seniór ba Banku Mundiál Timor-Leste, Pedro Martins, dehan Timor-Leste simu filafali kreximentu Produtu Internu Brutu (PIB), mas xave reforma importante hasa’e poténsia setór privadu no atende meta polítika Governu nian ne’ebé inklui taxa média kreximentu ekonómiku hosi porsentu 7 ba leten no kriasaun postu traballu maizumenus 60.000 kada tinan.

Iha ambiente makroekonómiku nafatin estavel. Inflasaun presu konsumidór tun no presaun ba apresiasaun taxa kámbiu reál diminui. Kréditu ba setór privadu sa’e porsentu 13, tanba demanda ne’ebé aas husi umakain.

“Banku mundiál forma estratéjia grupu foun ba tinan lima nian ba Timor-Leste, foka ba haforsa fundasaun ba kreximentu lidera hosi setór privadu, enkuantu mellora kapitál umanu no liga mós ho infraestrutura. Ami buka atu serbisu hamutuk liután ho Governu no setór privadu sira atu mellora limitasaun iha ezisténsia negósiu no ajuda hasa’e poténsia ba kriasaun serbisu”, Country Representative ba Timor-Leste Macmillan Anyanwu katak iha lansamentu relatóriu ne’e iha Hotel Novo Turismo, ohin.

Setór Privadu sei Hasoru Difikuldade ba Lisensa Negósiu, Kréditu no Rai

Reprezentante Banku Mundiál ne’e salienta, iha relatóriu ne’e mós hatudu katak setor privadu sei hasoru difikuldade hanesan durasaun ba lisensa negósiu maka demora tebes, defísil asesu ba kréditu no asesu ba rai atu halo negósiu.

“Loos duni katak durante ami-nia peskiza no ikus mai prodús relatóriu ne’e ami identifika setór privadu sira sei hasoru difikuldade liuliu atu hetan lisensa ba negósiu kleur, asesu ba kréditu no rai. Maibé ami espera katak liuhusi relatóriu ida ne’e bele halo diskusaun ida entre Governu no setór privadu sira hodi hetan rezultadu ne’ebé diak iha tempu mai”, Macmillan sujere.

Hodi hatutan, objetivu hosi relatóriu ne’e maka hosi Banku Mundiál halo peskiza ida saida mak akontese iha Timor-Leste. Iha relatóriu ne’e rasik foku espesiál ba iha setór privadu, ho intensaun katak bele kria diskusaun entre Governu, setór privadu no Banku Mundiál rasik hodi haree polítika Governu nian hodi dezenvolve di’ak liután setór privadu sira iha futuru.

“Relatóriu ne’e hateten mós katak sei mosu korrupsaun bainhira setór privadu sira halo pagamentu ruma, maibé ba oin tanba iha ona ekipamentu avansadu tan ne’e atu selu impostu ruma bele liuhosi sistema eletrónika ne’ebé banku sira estabelese no ministériu rasik”, katak.

Nia afirma sobre kreximentu ekonómiku porsentu 4.1, más objetivu Governu maka hetan kresimentu ekonomiku porsentu 7, maka atu atinje ida ne’e presiza kontribui hosi setór privadu no kria ambiente ne’ebé fasil ba setór privadu hodi halo negósiu.

Tuir Country Representative Banku Mundial iha Timor-Leste katak dadus ne’ebé sira utiliza hodi prodús relatóriu ne’e mai hosi banku sira, no Ministériu Finansa rasik.

Iha fatin hanesan, Ministru Koordenadór Asuntu Ekonómiku (MKAE) interinu, Fidelis Manuel Leite Magalhães, hateten relatóriu Banku Mundial nian di’ak tebes no aponta duni ekonomia Timor-Leste nian.

“Aponta katak ita-nia ekonomia rekupera hosi tinan 2017-2018, dokumentu ne’e rejistu kreximentu porsentu 4.1 no iha espetativa katak sei sa’e liután iha tinan hirak mai. Ne’ebé, ida ne’e hatudu katak ekonomia rekupera ona no hatudu mós katak ba empréstimu hosi banku pur volta porsentu 13 ne’ebé umakain sira foti osan hosi banku harii empreza ki’ik sira hodi hadi’a ekonomia família”, Ministru Fidelis Manuel hatete.

Relatóriu ne’e hatudu mós katak iha fatór balu maka impede kreximentu ekonómiku Timor-Leste hanesan korrupsaun, asesu ba kréditu sei difísil no rejistu ba rai sai problema boot.

Nia hatutan buat ne’ebé importante liu iha relatóriu ne’e aponta maka sujestaun ba Governu no entidade hotu atu servisu makaas liu atu halo forte setór privadu, ne’ebé tenke investe makaas iha sira.

Governante ne’e afirma, Governu sei kapasita setór privadu hodi aumenta kapasidade, treina halo planu negósiu, haree sistema akuntabilista ne’ebé di’ak, introdús jerasaun foun iha empreza sira.

“Buat sira ne’e hotu maka sai hanesan xave atu oinsá ami bele halo kreximentu ne’ebé maka di’ak liután no kualitativamente mós di’ak liu. Ha’u haree relatóriu mós haktuir katak ita presiza haree eletrisidade, bee no seguransa ba empreza sira bainhira ema ida halo negósiu no sente la seguru no tenke selu seguransa privada ba nia ne’e aumenta tan kustu operasionál”, informa.

MKAE interinu rekoñese katak setór privadu seidauk bele la’o mesak tanba estabelesimentu kompara hanesan ema karik sei joven. Tanba ne’e, Governu liuhusi IADE, CCI-TL hodi koopera ho Banku Mundiál hodi treina sira iha munisípiu hotu para sira bele hadi’a planu negósiu atubele asesu ba kréditu, no setór privadu sira tenke hatene lei no prosesu aprovizionamentu nune’e bele kompete ba projetu sira.

Relatóriu ekonómiku Timor-Leste foka liu ba dezenvolvimentu ba setór privadu. Mellora kompetividade no dezempeñu empreza lokál ne’ebé identifikadu nu’udar xave atu aselera kreximentu no hasa’e padraun moris nian.

Falta asesu ba iha finansiamentu, importasaun kompleksu no regulamentu negósiu no abilidade forsa traballu ne’ebé uitoan liga ho dezempeñu empreza ne’ebé fraka tebes hosi empreza- entre empreza hotu.

Prioridade polítika atu mellora dezempeñu negósiu inklui hasa’e asesu ba iha finanseiru, abilidade no kontribuisaun ne’ebé asesivel nune’e mós redús regulamentu inserteza sira.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here