Tabela klasifikasaun atleta Taekwondo iha Sea Games 2019.

DILI, 11 dezembru 2019 (TATOLI)–Prezidente Federasaun Taekwondo Timor-Leste (FTTL), Angelo Neves, hateten atleta Taekwondo hirak-ne’ebé hamorin Timor-Leste nia naran iha eventu internasionál Sea Games 2019 ne’ebé realiza iha Manila-Filipina, foin lalais ne’e, tanba atleta hirak ne’e esforsu no preparasaun di’ak.

“Atleta Taekwondo sira hatudu prestasaun di’ak iha Sea Games tanba ami iha prinsípiu ida-ne’ebé hori uluk kedas hakarak proteje dignidade nasaun nian,” Angelo dehan ba Agência Tatoli iha edifísiu Federasaun Taekwondo, Jináziu Dili, kuarta ne’e.

Atleta sira-ne’ebé hetan medalla mak hanesan Imbrolia Amorin, vensedora iha kategoria Under 57, hetan medalla osan-mutin ida. Ana da Costa hetan medalla osan-metan tanba lakon iha finál. Luísa dos Santos Rosa hetan medalla osan-metan iha kategoria Under 47. Enkuantu, Bonifácio da Costa hetan medalla osan-metan iha kategoria Under 54.

Iha parte seluk, Angelo relata, maski Taekwondo hatudu prestasaun di’ak maibé nia la satisfás ho kondisaun ne’ebé Comité Olímpico Nacional Timor – Leste (CONTL-sigla portugés) oferese ba atleta ladún di’ak, liuliu hela fatin no hahán.

“Kondisaun hela fatin no hahán ba atleta sira iha Filipina ladún di’ak. Fatin ida-ne’ebé sira hela laiha training center. Sira treinu de’it iha fatin baibain ne’ebé mak la merese ba atleta sira halo treinamentu. Maibé, ha’u sempre dehan ba ofisiál sira-ne’ebé ba ne’e katak kuandu imi hatudu prestasaun ne’ebé di’ak labele protesta barak. To’o ikus sira hatudu duni prestasaun di’ak ba nasaun,” nia haktuir.

Fó hanoin fali, atleta Taekwondo ne’ebé partisipa iha Sea Games hamutuk na’in-neen. Feto tolu no mane tolu. Atleta hirak ne’e sei fila hikas mai Timor-Leste iha 14 dezembru, tinan ne’e.

Jornalista: Hortençio Sanchez

Editór: Xisto Freitas

1 KOMENTÁRIU

  1. Atu kurizi deit katak; Ana mak hetan osan-mutin(silver) no Imbrolia Amorin mk hetan osan metan(Bronze). Abraços🙂

HAKEREK NO HATÁN

Please enter your comment!
Please enter your name here