Ró funu Militár Indonézia nian rua, KRI Usman Harun 359 no Sultan Iskandar Muda 367 hala’o vizita mai Timor-Leste. Imajen/Eugénio Pereira

DILI, 11 Dezembru 2019 (TATOLI)-Ró funu rua hosi militár Indonézia, KRI Usman Harun 359 no Sultan Iskandar Muda 367, kuarta ohin, to’o iha Dili, hodi hametin liután lasu kooperasaun entre Tentara Nasionál Indonézia (TNI) no FALINTIL-Forsa Defesa Timor-Leste.

Ró funu rua ne’e atraka iha Portu Dili,  iha oras dader ne’e, no simu diretamente hosi Embaixadór Indonézia ba Timor-Leste, Sahat Sitorus,  akompaña husi Komandante Operasaun F-FDTL, Tenente Koronel, Domingos Costa Santos,  no Segundu Komandante Polisia Munisípiu Dili, Superintendente Xefe, Euclides Belo.

Sahat,  sente orgullu  ho desizaun  hosi Governu TL nian liuhosi Ministru Defeza, no Komandu F-FDTL  tanba sei halo vízita  bá ró rua ne’e iha kinta (12/12) hodi partilla diak liután lasu kooperasaun no diplomasia entre nasaun rua iha área marítima.

“Vizita ró militár rua mai hodi hametin liután kooperasaun militár hodi hatudu katak, rai rua viziñu bele servisu hamutuk hodi hametin kooperasaun defeza no seguransa,” dehan Embaixadór RI ne’e ba jornalista iha Portu Dili.

Diplomátiku Indonézia ne’e, afirma Indonézia prontu koopera atu tulun Instituisaun F-FDTL liuliu halo operasaun konjunta  ba kontrola fronteira tasi entre nasaun rua iha futuru.

“Militár Indonézia prontu atu ajuda fó treinamentu ba militár Timor-Leste hanesan nasaun maun no alin ne’ebé iha fronteira tasi, rai no lalehan bele servisu hamutuk,” tenik, Sahat Sitorus.

Ró Funu KRI Usman Harun 359  produs BEA System marine ho ninia todan tonelada 1,940 no naruk metru 89,9 (295 ft), luan metru 95 (312 ft), ró ne’e iha kapasidade hodi  tula forsa hamutuk na’in 79. Ró ne’e hahú halo operasaun hosi 2001 to’o agora.

Enkuantu, Ró Sultan Iskandar Muda 367, produs iha Chelde Naval  Ship building SNS Vlissingen, Olanda, ho ninia  todan tonelada 1.700, ró ne’e ho nia  naruk metru 90,71 (297,60 ft) no luan metru 13,02 (42,72ft), ró iha kapasidade hodi akumula militár na’in 78. Ró ne’e hahú halo operasaun hosi tinan 2009 to’o agora.

Durante estadia iha nasaun ne’e, tuir planu ekipa delegasaun sei halo vízita kortéjia bá Ministériu Defeza hodi hasoru malu ho Ministru,  Filomeno da Paixão de Jesus,  Xefe Estadu Maiór Jenerál, Lere Anan Timur,  no Komandante Jerál PNTL, Komisáriu Faustino Cardoso.

Nune’e mós sei halo vizita bá  iha Semitériu Seroja Santa Kruz Dili hodi tau ai funan ba rate Erói sira.

Iha vizita ne’e, Embaixada Indonézia sei oferese jantar konfraternizasaun ho membru Governu da-ualu, Korpu Diplomátiku, Militár sira Indonézia no Timor-nian iha loron sesta (13/12) lokraik.

Entretantu, ró militár rua ne’e sei fila hikas ba Makasar no Surabaya Indonézia iha loron 14 fulan-dezembru 2019.

Jornalista: Eugénio Pereira

Editór:Francisco Simões

HAKEREK NO HATÁN

Please enter your comment!
Please enter your name here