Xefe Kaza Sivíl, Francisco Maria de Vasconcelos, hato'o sentida kondolénsia ba família saudozu 'Bere Mata Ruak'. Imajen Mídia PR

DILI, 11 Dezembru 2019 (TATOLI)–Prezidénsia Repúblika kompostu husi Xefe Kaza Sivíl, Francisco Maria de Vasconcelos no Espoza Prezidente Repúblika, Cidália Lopez Nobre Mouzinho Guterres presta omenajen ba asuwa’in Francisco Rodrigues Kalçona ‘Bere Mata Ruak’ ne’ebé hakotu iis iha Hospital Nacional Guido Valadares (HNGV), ohin dadeer.

Komunikadu ne’ebé TATOLI asesu husi Mídia Prezidénsia Repúblika, kuarta ne’e, hateten Bere Mata Ruak nu’udár membru fundadór União Nacional dos Estudantes Timorense (UNETIM) ne’ebé harii iha outubru 1974 hodi defende direitu estudante no luta ba ukun rasik an. UNETIM nu’udar organizasaun dahuluk ne’ebé implementa traballu baze nian ho objetivu lori povu sai protagonista luta libertasaun nasionál.

Nu’udár membru husi korpu Diretivu UNETIM, Bere Mata Ruak partisipa ativamente iha kampaña alfabetizasaun ho métodu Paolo Freire, edukadór populár husi Brazíl, atividade produsaun, saúde no konxiensilizasaun.

Ho baze UNETIM, FRETILIN harii Organização Popular da Juventude Timor (OPJT) iha 10 Juñu 1975 hodi halibur foin-sa’e hotu-hotu atu luta ba libertasaun nasionál.

Nu’udár estudante iha eskola Liceu DR Francisco Machado, Bere Mata Ruak hili atu husik ninia estudu hodi fó an tomak ba luta libertasaun nasionál.

Iha tempu ne’ebá, estudante sira mai ho palavra órden “mais vale perder um ano e ganhar a Pátria do que ganhar um ano e perder a Pátria (di’ak liu lakon tinan ida hodi manán Pátria, duké manán tinan ida hodi lakon Pátria).

Iha outubru 1975, ho ninia envolvimentu iha OPJT, FRETILIN nomea Bere Mata Ruak sai membru Comité Central FRETILIN ho responsabilidade nu’udár Vise-Sekretáriu OPJT.

Iha períodu FRETILIN hala’o funsaun nu’udár Governo de Facto, hafoin administrasaun Portugés husik Timor, OPJT iha papél prinsipál ba mobilizasaun povu iha Timor-Leste tomak iha edukasaun, kultura, ekonomia, seguransa no saúde hodi serbí interese povu ninian.

Ho ninia partisipasaun iha luta, militár Indonézia kaptura nia hodi kastigu no tortura nia dezde inísiu invazaun to’o Timor-Leste hetan nia ukun rasik an iha 1999. Bere Mata Ruak nu’udár prizioneiru polítiku ne’ebé tama-sai prizaun to’o hetan independénsia.

Hafoin Timor-Leste hetan nia ukun rasik an, Bere Mata Rauk manan-moris nu’udár mekániku no soldadór no nunka tane-liman ba Estadu nia tulun.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here