Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál, Lere Anan Timur. Imajen Tatoli/Egas Cristóvão

DILI, 11 dezembru 2019 (TATOLI)–Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, hato’o ba Prezidente Repúblika (PR), Francisco Guterres Lú Olo katak bainhira atu kontrola di’ak liután situasaun seguransa, tenke regulariza Grupu Arte Marsiál (GAM) sira hanesan organizasaun desportiva.

“To’o agora laiha situasaun ida-ne’ebé grave, maibé sei iha problema ki’ikoan sira iha fatin-fatin, sempre iha konflitu. Uluk ita rona dehan Grupu Arte Marsiál mak atake malu, maibé ikus ne’e ita rona fali dehan grupu mak atake malu. Maski nune’e, krimi sempre krimi nafatin. Tanba ne’e mak ha’u hateten ba Prezidente Repúblika katak, tuir loloos, Governu autoriza ona ezisténsia Arte Marsiál iha Timor, ho ninia estrutura própriu, ho ninia estatutu, ho nia sede atu ita bele kontrola”, Lere hato’o preokupasaun ne’e durante enkontru semanál ho Prezidente Repúblika, iha Palásiu Prezidente Nicolau Lobato, Bairru Pité, ohin.

Nia hatutan, bainhira formalizasaun ona mak bele halo kontrolu ba distúrbiu, ataka malu no konflitu iha rai-laran.

Lere mós lakohi atu husik de’it grupu sira abandona nune’e tanba, bainhira mosu konflitu, polísia ba kaer, lori ba Tribunál maibé tenke husik fali tanba laiha evidénsia forte atu bele fó kastigu.

“Tanba ne’e maka ha’u dehan Governu tenke loke duni, ezije sira-nia estatutu, hanesan mós ho organizasaun baibain, nune’e fasil bele halo kontrola, bainhira membru ida baku malu, kaer mak ninia lider atu bele responsabiliza”, nia hateten tan.

Nia fó ezemplu katak regulariza no formaliza hanesan mós grupu desportu sira seluk, nune’e bele kontrola di’ak liután ho fasil.

Kona-ba asuntu ne’e, Lere tenik, Prezidente Repúblika konkorda atu formaliza Grupu Arte Marsiál atu bele fasil hodi halo kontrola hanesan organizasaun desportiva.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here