Prezidente Repúblika, Francisco Guterres Lú Olo, entrega prémiu Direitu Umanu "Sergio Vieira de Mello" kategoria Direitu Sivíl no Polítiku ba manan-na'in, José Luís de Oliveira. Imajen/Mídia PR

DILI, 10 dezembru 2019 (TATOLI) – José Luís de Oliveira sente ‘ta’uk’ ho Prémiu Direitu Umanu “Sérgio Vieira de Mello” ne’ebé nia hetan iha tinan ne’e ba kategoria Direitu Sivíl no Polítiku, tanba bele halo nia reforma lalais husi serbisu ne’ebé hala’o durante tempu naruk. 

“Ha’u nunka hanoin atu hetan Prémiu Direitu Umanu ida-ne’e, maibé apresia tebes ba kolega sira ne’ebé kandidata ha’u iha Prémiu Sérgio Vieira de Mello tinan ne’e. Sorte antes sira kandidata ha’u la hatene. Se ha’u hatene karik, ha’u haruka sira atu kansela tanba ha’u ta’uk ho prémiu ida-ne’e halo ha’u bele reforma lalais”, José Luís ba Agência TATOLI, hafoin simu Prémiu Direitu Umanu iha Palásiu Prezidensiál, Bairru Pité, tersa ne’e.

Atuál Diretór Asian Justice And Rights (AJAR) ne’e, ta’uk reforma lalais tanba iha esperiénsia hatudu katak, antes ne’e Diretór Asosiasaun HAK, Aniceto Guterres bainhira hetan tiha prémiu hanesan deside la kontinua ona hodi hala’o serbisu.

Aleinde ne’e, nia temi tan, iha mós funsionáriu Asosiasaun HAK nian ida ne’ebé juniór liu, antes ne’e hetan mós prémiu hanesan maibé hafoin hetan deside para no lakohi kontinua serbisu no  envolve iha vida polítika.

Bainhira husu kona-ba tanbasá hakarak envolve-an servisu nu’udar ativista Direitu Umanu, José Luís hateten, ema hotu moris mai ho dignidade hanesan, koor kulit atu metan ka mutin, ki’ak ka riku, beik ka matenek, maibé iha prátika ema balun ne’ebé iha podér tenta atu esplora no viola ema seluk nia direitu.

“Tanba ida-ne’e maka ha’u konsidera Direitu Umanu ne’e importante atu ita-nia moris iha hakmatek no armonia, nune’e labele buka atu halo diskriminasaun”, nia dehan.

José Luís konta tuir katak nu’udar eis prizioneiru polítiku ne’ebé dadur iha Jakarta, nia sempre akompaña ativista Direitu Umanu sira husi Indonézia ne’ebé tau-matan ba prizioneiru polítiku sira no ida-ne’e mak sai hanesan inspirasaun boot ba nia.

“Hafoin sai husi prizaun, ha’u filafali mai Timór hamutuk ho kolega sira harii Yayasan HAK atu fó asisténsia ba prizioneiru polítiku sira no fó mós asisténsia umanitária ba família prizioneiru polítiku sira”, nia konta tuir.

Entretantu, tuir rezultadu avaliasaun husi Konsellu Agrasiamentu no Órden Onorífika ba selesaun kandidatu sira ne’ebé lee husi Prezidente Repúblika, Francisco Guterres Lú Olo liuhosi ninia diskursu hateten katak José Luís de Oliveira hala’o serbisu iha área Direitu Umanu durante tinan barak ona.

“Sidadaun ne’e fó ona prova katak nia iha duni konsisténsia iha ninia hahalok sira no durante tinan barak nia la muda ninia atividade sai hosi área Direitu Umanu”, haktuir intervensaun Xefe Estadu

José Luís de Oliveira harii no hola parte iha organizasaun oioin ne’ebé mak hala’o knaar iha área Direitu Umanu.

“Ativista Direitu Umanu ida-ne’e dala barak hatudu korajen hodi ko’alia defende buat ne’ebé mak nia sente katak loos no justu”, PR hatutan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here