Juventude FRETILIN halo Marcha da Paz hosi CCF to'o Jardín Largu Lecidere. Imajen/Arminda

DILI, 10 dezembru 2019 (TATOLI) – Relasiona komemorasaun loron Internasionál Direitu Umanu ba dala-71, Juventude Frente Revolusionária Timor-Leste Indepedente (FRETELIN) ho inisiativa komemora ho Marcha da Paz husi Komite Sentrál FRETELIN (CCF-sigla portugés) to’o Jardín Largu Lecidere.

Objetivu Komisaun Polítika Juventude FRETELIN organiza aktividade ida-ne’e tanba tinan-71 liubá (1949-2019), mundu tomak aseita direitu umanu liuhosi deklarasaun universál deireitu umanu.

“Juventude FRETILIN foti inisiativa komemora loron ida-ne’e, atu fó hanoin filafali ba joven hotu iha Timór laran tomak, ba populasaun sira no Estadu katak Timor-Leste mós hanesan nasaun ne’ebé hola parte ba Nasaun Unida”, tenik Sekretáriu Jerál Juventude FRETELIN, Abrão Nokosiku, tersa ne’e.

Nia subliña, ba juventude FRETILIN sira nia hanoin, direitu ne’ebé importante liu maka direitu ba empregu ne’ebé tuir deklarasaun universál diretu umanu artigu 23 dehan  ema hotu iha mundu iha direitu ba serbisu dignu no  manan saida mak sira hetan hosi serbisu.

“Saida mak ami hakarak fó hanoin ba públiku joven sira no Estadu Timor-Leste mak direitu ida-ne’e too agora la hetan iha Timór. Ita haree Timor-Leste tinan ba tinan númeru dezempregu aumenta ba beibeik maibé kampu servisu laiha ba juventude sira”, Abrão haktuir.

Enkuantu, Estadu ida-ne’e iha tinan barak nia laran lori timór-oan no povu nia naran jere povu nia osan maibé laiha kampu traballu ba joven sira.

“Saida mak ita rona husi polítika Governu atuál, promete katak sei kria empregu 60.000 maibé iha loron seluk mai dehan fali dezempregu iha Timór ne’e iha de’it porsentu 10. Ida-ne’e hatudu katak polítiku sira ne’ebé maka responsabiliza rikusoin povu ninian tenta atu manipula direitu no atu viola direitu ida-ne’e”, nia dehan tan.

Abrão hatutan, iha deklarasaun universál ba direitu umanu mós hateten katak ema hotu iha direitu ba edukasaun no goja diretu.

“Iha Timór ita nia Konstituisaun fó garantia ona maibé ita haree katak direitu ida ba eskola públiku sira seidauk iha kualidade tanba kontinua aat ba beibeik. Kualidade ida-ne’e mak  prejudika oinsá mak ita bele kore povu husi nakukun laran se eskola kontinua laiha kualidade,” Abrão tenik.

Iha biban ida-ne’e, juventude FRETELIN hato’o sira nia solidaridade ba povu no nasaun sira ne’ebé uluk ajuda ba Timór ninia indepedénsia, maibé ohin loron sira rasik sei luta hela ba sira nia auto-determinsaun mak hanesan povu Sahara Osidental, Palestina no Papua.

“Tinan barak ona, uluk kedas hahú nasaun sira-ne’e mós ajuda no hamutuk ho ita luta ba indepedénsia, maibé ohin loron sira rasik sei luta hela ba sira nia auto-determinsaun. Estadu Timor-Leste iha nia Konstituisaun hodi garante, tanba ne’e ita tenke defende ba povu sira ne’ebé luta ba sira nia auto-determinasaun no ita labele taka matan ba ida-ne’e. Uluk nasaun sira seluk mak taka matan ba ita karik, Timór labele hetan ninia referendu  no ukun rasik-aan”, Nokosiku salienta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here